Ռուսաստանը նավթ արտադրող երկրների շրջանում հնարավորություն ունի ավելի հեշտ հաղթահարել նավթի համաշխարհային գների անկման հետևանքները, հինգշաբթի հայտարարել է ԿՀՎ տնօրեն, ԱՄՆ ռազմաօդային ուժերի պահեստային գեներալ Մայքլ Հեյդենը, ում կանխատեսումները մեջբերում են Ասոշիեյթիդ փրես և Ռոյթեր տեղեկատվական գործակալությունները։
«Ռուսաստանն այնպիսի խելամիտ ներդրումներ է արել և ունի այնքան մեծ ինքնավար հիմնադրամ, որ այն, հավանաբար, կարող է առավել հեշտությամբ հաղթահարել նավթի համաշխարհային գների անկման հետևանքները», - հայտարարել է Հեյդենը Վաշինգտոնի մերձակայքում գտնվող Լենգլի քաղաքում (Վերջինիա նահանգ) ԿՀՎ-ի շտաբ-բնակարանում լրագրողների հետ հանդիպման ժամանակ։
Ըստ Հեյդեի կանխատեսման, մեկ բարել նավթի համար 40 դոլարին մոտ մակարդակի դեպքում առավելի շատ կարող են տուժել այնպիսի նավթաարդյունահանող երկրներ, ինչպիսիք են Իրանն ու Վենեսուելան։
Հեյդենի գնահատմամբ, նավթի համաշխարհային գների անկման և անկայուն իրավիճակում Իրանը երկրի տնտեսության մեջ կարող է զգալ միջազգային պատժամիջոցների հետևանքները, իսկ Վենեսուելայի կառավարությունը կարող է բախվել ներքին դժվարությունների հետ։
Հեյդենը մոտ ժամանակներում կլքի ԿՀՎ-ի տնօրենի պաշտոնը։ Անցած շաբաթ ԱՄՆ ընտրված նախագահ Բարաք Օբաման պաշտոնապես հայտարարել է, որ իր վարչակազմում ԿՀՎ նոր տնօրեն կդառնա 70-ամյա Լեոն Փանեթը, ով ԱՄՆ նախագահ Բիլ Քլինթոնի վարչակազմում Սպիտակ տան աշխատակազմի ղեկավարն էր։-0-
