ԵՐԵՎԱՆ, 12 նոյեմբերի. /Նովոստի-Արմենիա/. Ռուսաստանին կհաջողվի խուսափել գլոբալ խնդիրներից հիփոթեքային շուկայում։ Այդ մասին հայտատարեց ռուսական ՎՏԲ Բանկ ԲԲԸ վարչության նախագահ Անդրեյ Կոստինը՝ հանդես գալով ՎՏԲ Բանկի և Հայաստանում, Ուկրաինայում ու Բելառուսում երեք դուստր բանկերի միջև տեսակամուրջի ընթացքում։
Ըստ նրա, հիփոթեքային վարկավորումը Ռուսաստանում բավականին լավ ապահովված է գրավով, ինչի հետ կապված շուկայում չպետք է ԱՄՆ-ի իրավիճակի նման խնդիրներ առաջանան։
Ավելին, նա նշեց, որ բանկը Ռուսաստանում հիփոթեքային վարկեր է տրամադրում 20 տարի ժամկետով, իսկ Ուկրաինայում և Բելառուսում՝ մինչև 25-30 տարի։
«Հիփոթեքը մեզ մոտ լավ է ապահովված, և մինչև երկրում չսկսվի գլոբալ ճգնաժամ, խնդիրների մասին խոսելը վաղ է»,- ասաց Կոստինը։
Միաժամանակ նա նշեց, որ չի ցանկանում կանխատեսել իրավիճակի խստացում հիփոթեքային շուկայում։
«Չեմ կարծում, թե հիփոթեքային շուկայում գլոբալ խնդիրներ կառաջանան և գտնում եմ, որ Ռուսաստանին կհաջողվի խուսափել համաշխարհային ֆինանսական ճգնաժամի բացասական հետևանքներից այդ շուկայում, ինչպես դա տեղի ունեցավ ԱՄՆ-ում»,- ասաց Կոստինը։ -0-
