ՌԴ-ն կշարունակի մասնակցել Մերձդնեստրի և Լեռնային Ղարաբաղի հակամարտությունների կարգավորմանը
Ռուսաստանը կշարունակի աջակցել լարվածության օջախների վերացմանը հարևան տարածաշրջաններում, մասնավորպապես, հակամարտությունների կարգավորմանը Մերձդնեստրում և Լեռնային Ղարաբաղում, հայտարարեց ՌԴ նախագահ Դմիտրի Մեդվեդևը։
«Մենք հետագայում ևս կշարունակենք նպաստել սահմանակից տարածաշրջաններում անկայունության օջախների վերացմանը։ Ելնելով առկա ձևաչափերի նկատմամբ ունեցած հարգանքից՝ մենք կաջակցենք մերձդնեստրյան և ղարաբաղյան կարգավորմանը, կհամագործակցենք շահագրգիռ բոլոր կողմերի հետ, կգանք փոխընդունելի համաձայնությունների»,- ասաց Մեդվեդևը՝ հրապարակելով ուղերձը ՌԴ Դաշնային ժողովին, տեղեկացնում է «ՌԻԱ Նովոստին»։
Միաժամանակ նախագահն ընդգծեց, որ Կովկասյան հակամարտության ժամանակ Վրաստանին խաղաղության հարկադրելուն ուղղված Ռուսաստանի որոշումը օպերացիա սկսելու մասին և անցկացրած օպերացիան ուղղված էին ոչ թե վրացի ժողովրդի դեմ, այլ Հարավային Օսեթիայի բնակիչների և ռուս խաղաղապահների փրկությանը, Հարավային Օսեթիայի և Աբխազիայի ժողովուրդների ամուր և երկարաժամկետ անվտանգության ապահովմանը։
«Կովկասյան ճգնաժամը ցույց տվեց, որ հակամարտության կողմերից մեկի կողմից ուժի գործադրումը չի կարող ապահովել կենսունակ որոշում»,- ասաց Մեդվեդևը։
Ռուսաստանը ճանաչեց Հարավային Օսեթիայի և Աբխազիայի անկախությունը օգոստոսի 26-ին։ Այդ հանրապետությունների բնակիչները դիմեցին անկախություն ճանաչելու խնդրանքով օգոստոսի 8-12-ի դեպքերից հետո, երբ Վրաստանը ռազմական օպերացիա անցկացրեց Հարավային Օսեթիայում։ Այդ ժամանակ վրացական զորքերը գրեթե ամբողջովին ավերեցին հանրապետության մայրաքաղաք Ցխինվալ քաղաքը և բազմաթիվ բնակավայրեր՝ սպանելով, հարավօսական իշխանութոյւնների տվյալներով, մոտ մեկուկես հազար խաղաղ բնակիչների։
ԽՍՀՄ փլուզումից հետո Մոլդովայի՝ Դնեստր գետի ձախ ափին տեղակայված մի քանի շրջաններ, որոնց բնակչությունը վախեցած էր Աջափնյա արմատականների հայտարարություններով՝ Մոլդավիայի՝ Ռումինիային հնարավոր միացման վերաբերյալ, հայտարարեցին Մերձդնեստրյան Մոլդովական Հանրապետություն ստեղծելու մասին։ Մոլդովայի իշխանութոյւնները չհամաձայնեցին հանրապետության բաժանման հետ և փորձեցին զինված ճանապարհով լուծել անջատողական հակամարտությունը։ Ռազմական բախումը շարունակվեց մի քանի ամիս։
Ներկայումս խաղաղաությունը հակամարտության գոտում պահպանում են Միավորված խաղաղապահ ուժերը՝ ռուսական, մոլդովական և մերձդնեստրյան կոնտինգենտների կազմում։ Մերձդնեստրի իշխանութոյւնները շարունակում են անկախություն պահանջել այդ տարածաշրջանի համար։ Քիշնևը չի համաձայնում երկրի բաժանմանը՝ առաջարկելով խնդրի լուծման տարբերակներ՝ ներառյալ Մերձդնեստրին լայն ինքնավարության տրամադրումը։
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։
Հայաստանի, Ռուսաստանի և Ադրբեջանի նախագահներ Սերժ Սարգսյանի, Դմիտրի Մեդվեդևի և Իլհամ Ալիևի կիրակնօրյա հանդիպումից հետո երեք երկրների առաջնորդները ստորագրել են հռչակագիր, որտեղ կողմերը պատրաստակամություն են հայտնում նպաստել Հարավային Կովկասում իրավիճակի առողջացմանը և տարածաշրջանում կայունության ու անվտանգության մթնոլորտի հաստատման ապահովմանը՝ Լեռնային Ղարաբաղի հակամարտության քաղաքական կարգավորման ճանապարհով: --0--
