Վրաստանի խորհրդարանը հինգշաբթի կոչ է արել երկրի կառավարությանը խզել դիվանագիտական հարաբերությունները ՌԴ-ի հետ։ Այդ որոշմանը կողմ է քվեարկել դահլիճում ներկա գտնվող 106 պատգամավոր, հաղորդում է ՌԻԱ Նովոստին։
Դիվանագիտական հարաբերությունների խզման մասին առաջարկը տեղ է գտել «Ռուսաստանի Դաշնության կողմից Վրաստանի տարածքի գրավման մասին» որոշման մեջ։
«Վրաստանի խորհրդարանը հանձնարարում է կառավարությանը խզել դիվհարաբերությունները Ռուսաստանի Դաշնության հետ»,- ասվում է որոշման մեջ։
Ելույթ ունենալով պատգամավորների առջև, այս որոշման հեղինակներից մեկը՝ Արտաքին կապերի խորհրդարանական կոմիտեի նախագահ Լաշա Ժվանիան հստակեցրեց, որ դիվանագիտական հարաբերությունների վերաբերյալ Վիեննայի կոնվենցիայի համաձայն, նրանց խզումը «միշտ չէ, որ հյուպատոսական հարաբերությունների խզում է նշանակում»։
Չորեքշաբթի Վրաստանի ԱԳՆ-ն որոշում ընդունեց նվազագույնի հասցնել իրենց դիվանագետների թիվը Մոսկվայում։ Ինչպես հայտնեց լրագրողներին Վրաստանի արտգործնախարարի տեղակալ Նինո Կալանդաձեն, ԱԳՆ-ն որոշում էր ընդունել իրենց դիվանագետների թիվը Ռուսաստանում հասցնել երկուսի։ Նրա խոսքերով, Ռուսաստանում դիվանագետների թվի կտրուկ կրճատման մասին որոշումը կապված է Ռուսաստանի ղեկավարության՝ վրացական տարածաշրջաններ Աբխազիայի և Հարավային Օսեթիայի ճանաչման միակողմանի քայլերի հետ։
Վրաստանն օգոստոսի 8-ին ռազմական գործողություններ սկսեց Հարավային Օսեթիայում։ Հարավային Օսեթիայի բնակիչների պաշտպանության նպատակով, որոնցից շատերը ռուս քաղաքացիներ էին, Ռուսաստանը որպես օգնություն տարածաշրջան մտցրեց այնտեղ գտնվող խաղաղապահներին՝ շուրջ 10 հազար զինծառայող և ռազմական տեխնիկայի հարյուրավոր միավորներ։
Օգոստոսի 12-ին Ռուսաստանը հայտարարեց Վրաստանին խաղաղության հարկադրելու մասին օպերացիայի ավարտի մասին, իսկ օգոստոսի 22-ին հայտարարեց, որ ավարտել է իր զորքերի դուրսբերումը այն դիրքերին, որոնք սահմանված էին վրաց-օսական հակամարտության կարգավորման Խառը վերահսկող հանձնաժողովի 1999թ.-ի որոշումով։
ՌԴ նախագահ Դմիտրի Մեդվեդևը երեքշաբթի հրամանագրեր ստորագրեց Հարավային Օսեթիայի և Աբխազիայի անկախության ճանաչման մասին և հանձնարարեց ՌԴ ԱԳՆ-ին բանակցություններ սկսել նրանց հետ դիվանագիտական հարաբերություններ հաստատելու վերաբերյալ։ -0-
