Մինչև մայիս Պուտինը և Մեդվեդևը միասին նախապատրաստելու են Ռուսաստանի գործադիր իշխանության կառուցվածքը

ԵՐԵՎԱՆ, 3 մարտի./Նովոստի-Արմենիա/. Վլադիմիր Պուտինը և ՌԴ նորընտիր նախագահ Դմիտրի Մեդվեդևը մինչև մայիս, երբ տեղի է ունենալու նոր նախագահի երդման արարողությունը, նախապատրաստելու են գործադիր իշխանության կառուցվածքը։

«Գործող օրենսդրության համաձայն, մայիսի սկզբին տեղի կունենա նորընտիր նախագահի երդման արարողությունը։ Մինչ այդ, ինչպես և պայմանավորվել էինք, միասին զբաղվելու ենք գործադիր իշխանության կառուցվածքի նախապատրաստմամբ»,- երկուշաբթի Մեդվեդևի հետ հանդիպմանն ասաց Պուտինը։

«Եվ ես կխնդրեի, որ այդ ժամանակահատվածում դուք Ձեր վրա վերցնեք Պետխորհրդի նախագահությունների պատրաստման և անցկացման աշխատանքները»,- ասաց ՌԴ նախագահը, հաղորդում է «ՌԻԱ Նովոստին»։

Պուտինը ևս մեկ անգամ շնորհավորեց Մեդվեդևին ընտրություններում հաղթելու կապակցությամբ, քանի որ նա, ԿԸՀ վերջին տվյալներով, հավաքում է ընտրողների ձայների ավելի քան 70 տոկոսը։

Մեդվեդևը հայտարարեց, որ ինքը պատրաստ է անհապաղ զբաղվել այն հարցերով, որոնք առաջադրել է նախագահը։

«Ես պատրաստ եմ կատարել այն առաջադրանքները, որոնց մասին Դուք ասացիք և ուսումնասիրել նաև կառավարության կառուցվածքը և հենց հիմա զբաղվել այն հիմնախնդիրներով, որոնց մասին նշեցիք»,- նկատեց Մեդվեդևը։

Մեդվեդևը նաև նշեց. «Ես կարծում եմ, որ ընտրությունների արդյունքները, վերջին հաշվով, մեր քաղաքացիների գնահատականն է այն ուղուն, որն այդքան արդյունավետ իրականացվում է վերջին տարիներին»։--0—