ԵՐԵՎԱՆ, 4 փետրվարի./Նովոստի-Արմենիա/. Ռուսաստանը կվերանայի իր մոտեցումները մյուս ինքնորոշված հանրապետությունների հետ իր հարաբերությունների զարգացման վերաբերյալ, եթե սերբական Կոսովո երկրամասը հռչակի իր անկախությունը, կարծում է Պետդումայի միջազգային հարցերով կոմիտեի ղեկավար Կոնստանտին Կոսաչովը։
«Եթե հռչակվի Կոսովոյի անկախությունը, իսկ դրանում կասկած լինել չի կարող, ապա, անշուշտ, դա պետք է ազդի նաև այլ ինքնորոշված հանրապետությունների հետ հարաբերությունների զարգացման՝ Ռուսաստանի մոտեցումների վրա»,-ասել է Կոսաչովը լրագրողներին երկուշաբթի, հաղորդում է «ՌԻԱ-Նովոստին»։
Նա նշել է, որ Ռուսաստանը միշտ հանդես է եկել պետությունների տարածքային ամբողջականության օգտին։
Պատգամավորի կարծիքով, «կոսովյան անջատողականության» ֆենոմենն ունի առավելապես արտաքին, քան ներքին արմատներ։
«Եթե չլիներ այդ անջատողականության հետևողական խրախուսումը, այսպես կոչված, Արևմուտքի և նախևառաջ ԱՄՆ-ի, նաև մասամբ Եվրոմիության կողմից, կոսովյան անկախության որևէ հեռանկար սկզբունքորեն չէր կարող լինել»,-ասել է խորհրդարանականը։
Նա նշել է նաև, որ Կոսովոյի շուրջ իրավիճակի զարգացման ողջ պատասխանատվությունը «միանգամայն և ամբողջովին կրում է ԱՄՆ-ը և նրան աջակցող Եվրոպական միության երկրները» և կարծիք է հայտնել, որ սերբական երկրամասի անկախության հռչակումն ընդունվելու է ոչ թե Պրիշտինայում, այլ Վաշինգտոնում և Բրյուսելում։
«Բայց այդ որոշումը, այս կամ այն քաղաքական կամքի համաձայն, կարող է չկայանալ կամ կարող է հետաձգվել անորոշ ժամանակով»,-ասել է Կոսաչովը։
Կոսովոն, որը պաշտոնապես դեռևս Սերբիայի մասն է, 1999թ.-ից գտնվում է ՄԱԿ-ի կառավարման ներքո։ Բելգրադի և Պրիշտինայի միջև մարզի վերջնական կարգավիակի վերաբերյալ բանակցությունները, որոնք ընթանում էին վերջին տարիներին, ավարտվել են անարդյունք։
Կոսովոյի ղեկավարությունը հայտարարել է, որ պատրաստ է հռչակել երկրամասի անկախությունը մոտ ժամանակներս՝ ԱՄՆ-ի և Արևմուտքի կողմից այդ որոշման հավանության դեպքում։ Փորձագետները նշում են անկախության հռչակման մոտավոր ժամկետները, որոնք տատանվում են փետրվարի սկզբից մինչև մարտի կեսը։
ՌԴ ԱԳՆ ղեկավար Սերգեյ Լավրովը անցյալ տարվա դեկտեմբերին հայտարարել էր, որ Կոսովոյի անկախության միակողմանի հռչակումը ազդակ կհանդիսանա այլ տարածաշրջաններում, նախևառաջ Բալկաններում անջատողականության զարգացման համար, ինչպես նաև նախադեպ կհանդիսանա հետխորհրդային տարածքում չճանաչված հանրապետությունների համար։--0--
