ԵՐԵՎԱՆ, 14 դեկտեմբերի./Նովոստի-Արմենիա/.ՎՏԲ խումբը ծրագրում է մոտակա կես տարվա ընթացքում Ղազախստանում և Ղրղզստանում դուստր բանկեր ստեղծել, ուրբաթ Մինսկում լրագրողներին հայտնել է բանկի ավագ փոխնախագահ Նիկոլայ Կուզնեցովը։
Նրա խոսքերով, սկզբում այդ երկրներում կստեղծվեն ՎՏԲ բանկի ներկայացուցչություններ, ապա դրանց հիմքի վրա կհայտնվեն դուստր բանկեր, հաղորդում է «ՌԻԱ-Նովոստին»։
ՎՏԲ խմբի ղեկավար Անդրեյ Կոստինն իր հերթին հայտնել է, որ ԱՊՀ ողջ տարածքում բանկային խմբի կողմից դուստր բանկեր ստեղծելը կարևոր նպատակ է, որը ծրագրվում է իրականացնել մինչև հաջորդ տարեվերջ։
Ընդ որում, ամռան սկզբին հայտարարվում էր, որ ՎՏԲ-ի դուստր բանկերը պետք է հայտնվեն ԱՊՀ բոլոր երկրներում 2008թ. կեսին։
«Մինչև 2008թ. կեսը ԱՊՀ երկրների հարյուր տոկոսանոց ծածկումը դյուրին խնդիր չէ, բայց մենք կփորձենք իրականացնել այն»,-ասել է Կուզնեցովը՝ պատասխանելով այն հարցին, թե արդյո՞ք խումբը ծրագրում է երկարաձգել ԱՊՀ-ում բանկային խմբի ձևավորման ավելի վաղ հայտարարված ժամանակացույցը։
ՎՏԲ խումբն աշխատում է 1990թ.-ից։ Խմբի մեջ են մտնում ոչ միայն ՎՏԲ-ի գլխավոր բանկը և դուստր բանկերը (ՎՏԲ-24, «ՎՏԲ Հյուսիս-Արևմուտք» բանկ), այլև հինգ դուստր բանկեր ԱՊՀ-ում (մեկական՝ Հայաստանում, Վրաստանում և Բելառուսում և երկու բանկ Ուկրաինայում), վեց բանկ Եվրոպայում (Մեծ Բրիտանիայում, Ֆրանսիայում, Գերմանիայում, Ավստրիայում, Շվեյցարիայում և Կիպրոսում), ինչպես նաև երկու բանկ Աֆրիկայում (Անգոլա և Նամիբիա)։--0--
