Ռուսաստանը բավականին ուժ և միջոցներ ունի՝ իր շահերը պաշտպանելու համար.Վ. Պուտին
Ռուսաստանը բավականին ուժ և միջոցներ ունի, որպեսզի պաշտպանի իր շահերը՝ իր տարածքում և ուրիշ տարածաշրջաններում, հայտարարել է Ռուսաստանի նախագահ Վլադիմիր Պուտինը, հաղորդում է «ՌԻԱ Նովոստին»։
«Ուղիղ գծի» ընթացքում Նովոսիբիրսկի մի բնակչի խնդրանքով նման մեկնաբանություն է արել Վ. Պուտինը ԱՄՆ-ի նախկին պետքարտուղար Մադլեն Օլբրայթի այն հայտարարությանը, թե «անարդարացի է», որ Ռուսաստանը տիրում է բնական հսկա պաշարների։
Վ. Պուտինը ասել է, որ ծանոթ չէ Մ. Օլբրայթի այդ հայտարարությանը, սակայն «գիտի, որ որոշ քաղաքական գործիչների մոտ կան նման մտքեր»։
«Ռուսաստանը բավականին ուժ և միջոցներ ունի, որպեսզի պաշտպանի իր շահերը՝ իր տարածքում և աշխարհի այլ տարածաշրջաններում», - ասել է Վ. Պուտինը։
Նա ռուսական հարստության հանդեպ պահանջախնդրությունը անվանել է «քաղաքական էրոտիկա»։
«Իմ կարծիքով, սա այնպիսի քաղաքական էրոտիկա է, որը, մի գուցե, ինչ-որ մեկին բավարարվածություն կպատճառի, սակայն դժվար թե հանգեցնի դրական արդյունքի», - նշել է նախագահը։
Նա օրինակ է բերել Իրաքում տիրող իրավիճակը. «Փոքր պետություն, որը դժվար թե կարողանա իրեն պաշտպանել և որն ունի նավթի հսկա պաշարներ։ Եվ ի՞նչ է այնտեղ տեղի ունենում՝ մենք բոլորս շատ լավ գիտենք։ Կրակել սովորել են, սակայն կարգի բերել դեռևս այդքան լավ չի ստացվում։ Եվ դժվար թե ստացվի, քանի որ ժողովրդի հետ պատերազմելը միանգամայն անհեռանկարային գործ է»։
«Կարելի է քաղաքական գրատախտակից ջնջել որևէ բռնապետական ռեժիմ, օրինակ Սադամ Հուսեյնի ռեժիմը, բայց ժողովրդի հետ պատերազմելը անհեռանկարային խնդիր է», - նշել է ՌԴ նախագահը։-0-
