Ալիևը հույս ունի, որ կակտիվանա Ռուսաստանի և Ադրբեջանի համագործակցությունը՝ Կովկասյան տարածաշրջանի խնդիրների կարգավորման գործում

Ադրբեջանի նախագահ Իլհամ Ալիևը հույս ունի, որ կակտիվանա Ռուսաստանի և Ադրբեջանի համագործակցությունը՝ Կովկասյան տարածաշրջանի հակամարտություների կարգավորման գործում։

«Այստեղ՝ Կովկասյան տարածաշրջանում, շատ բան է կախված Ռուսաստանից և Ադրբեջանից։ Մենք տրամադրված ենք շարունակել ակտիվ շփումները»,-հայտարարել է Ալիևը՝ պաշտոնական այցով Ադրբեջանում գտնվող ՌԴ փոխվարչապետ Սերգեյ Նարիշկինի հետ Բաքվում ունեցած հանդիպման ժամանակ, հաղորդում է «ՌԻԱ Նովոստին»։

«Հույս ունենք, որ Ձեր այցը մեծ դեր կխաղա այդ գործում»,-հավելել է Ադրբեջանի նախագահը։

Նրա խոսքերով, Ռուսաստանի և Ադրբեջանի համագործակցությունը դուրս է  գալիս երկկողմ համաձայնագրերի շրջանակներից և վերաբերում է տարածաշրջանային անվտանգության և համագործակցության ամրապնդման խնդիրներին։

Ընդհանուր առմամբ, Ալիևը վստահություն է հայտնել, որ Նարիշկինի այցը Ադրբեջան «շատ հաջող կլինի և կնպաստի երկու երկրների հարաբերությունների հետագա զարգացմանը»։ Հանրապետության նախագահի խոսքերով, Ռուսաստանի ու Ադրբեջանի հարաբերությունները շատ դինամիկ են զարգանում ինչպես քաղաքական, այնպես էլ տնտեսական ոլորտներում։ «Այդ համագործակցությունը շատ լավ արդյունք է տալիս»,-ասել է նա։

Նրա խոսքերով, ներկայում երկկողմ ապրանքաշրջանառությունը աճում է, իսկ փոխադարձ առևտրի դինամիկան դրական է։ Ալիևը հույս է հայտնել, որ ռուս-ադրբեջանական միջկառավարական հանձնաժողովը, որը վերսկսում է իր աշխատանքը, կնպաստի երկու երկրների ավելի սերտ ինտեգրմանը։--0—