ԵԽԽՎ ղեկավարը համոզված է, որ Պոլիտկովսկայայի սպանության հետաքննությունը կհասցվի մինչև վերջ

ԵՐԵՎԱՆ, 28 օգոստոսի./Նովոստի-Արմենիա/. Եվրոպայի Խորհրդի Խորհրդարանական Վեհաժողովի (ԵԽԽՎ) ղեկավար Ռենե վան դեր Լինդենը գոհ է «Նովայա գազետա» թերթի մեկնաբան Աննա Պոլտկովսկայայի սպանության  հետաքննության ընթացքից։ Նա համոզված է, որ լրագրողի գործը, որի վրա կրակել էին անցյալ տարվա հոկտեմբերի 7-ին՝ Մոսկվայի կենտրոնում գտնվող իր տան շքամուտքում, կհասցվի մինչև վերջ։

ՌԴ գլխավոր դատախազությունը նախօրեին հայտարարել էր լրագրողի սպանության բացահայտման մասին։ ՌԴ գլխավոր դատախազի խոսքերով, ձերբակալվել են 10  կասկածյալներ, որոնց թվում՝ ուժային կառույցների հինգ նախկին աշխատակիցներ և Մոսկվայում գործող Չեչնիայի կազմակերպված հանցավոր խմբավորման առաջնորդը, նաև պարզվել է սպանության պատվիրատուն, որը թաքնվում է արտասահմանում, հաղորդում է «ՌԻԱ Նովոստին»։

«Լրագրողները մտքի արտահայտման ազատության անփոխարինելի պաշտպաններ են և այդ պատճառով էլ ժողովրդավարության հիմնական հենասյուներից են։ Ռուս ամենախիզախ լրագրողներից մեկի սպանությունը, որը մեծ ավանդ է ունեցել Չեչնիայում մարդու իրավունքների խախտումների բացահայտման գործում, ուղիղ հարված էր ժողովրդավարությանը»,- ասվում է ԵԽԽՎ ղեկավարի հայտարարությունում։

Պոլիտկովսկայայի սպանության մասին խոսելով՝ վան դեր Լինդենը վստահություն է հայտնել, որ «սպասվող մանրամասն հետաքննությունը ամբողջովին լույս կսփռի այս գործի վրա»։

«Ուզում եմ երախտագիտությունս հայտնել ռուսական իշխանություններին՝ կատարած աշխատանքի համար և նրանց ցանկանալ ուժ չխնայել՝ իրականությունը պարզելու համար»,- ասաց ԵԽԽՎ նախագահը։

ԵԽԽՎ-ն նախկինում բազմիցս կոչ էր արել ռուսական իշխանություններին՝ դատարանին հանձնել լրագրողի սպանության մեղավորներին։ --0—