Շավարշ Քոչարյանը բացառել է արտաքին ուժերի միջամտությունը ներքաղաքական իրավիճակին

ԵՐԵՎԱՆ, 26 ապրիլի. /Նովոստի Արմենիա/. Հայաստանի փոխարտգործնախարար Շավարշ Քոչարյանը հինգշաբթի լրագրողների հետ զրույցում բացառել է արտաքին ուժերի միջամտությունը Հայաստանի ներքաղաքական կյանքին բողոքի ակցիաների ժամանակաշրջանում:

«Ոչ մի գործընկեր այս շրջանում չի փորձել միջամտել Հայաստանի ներքաղաքական կյանքին», - ասաց Քոչարյանը:


Նա կարծում է նաև, որ իրավիճակը Հայաստանում պետք է խաղաղ հանգուցալուծում ստանա` օրենքի ու Սահմանադրության շրջանակում: Ըստ Քոչարյանի, ներկա իրավիճակում արտաքին գործերի նախարարությունը պետք է աշխատի ավելի ուժեղացրած ռեժիմով:

«Կարևոր եմ համարում, որ բոլոր պետական կառույցներն աշխատեն հիմա բնականոն ռեժիմով, ինչը շատ կարևոր է երկրի, նրա անվտանգության ու միջազգային հեղինակություն համար», - ասաց Քոչարյանը` հույս հայտնելով, որ այդպես էլ կլինի:

Հանրապետությունում ապրիլի 13–ից անցկացվող բողոքի լայնածավալ ակցիաների ֆոնին Հայաստանի վարչապետ Սերժ Սարգսյանն ապրիլի 23–ին հայտարարեց իր հրաժարականի մասին։ Նույն օրը Հայաստանի նախագահ Արմեն Սարգսյանն ընդունեց կառավարության հրաժարականը։ Ապրիլի 25–ի հանրահավաքի ժամանակ Նիկոլ Փաշինյանն առաջարկվեց որպես Հայաստանի վարչապետի պաշտոնի թեկնածու։ -0-