Սարգսյան. «Շանթ 2015» հրամանատարաշտաբային զորավարժությունները հասել են իրենց նպատակին

ԵՐԵՎԱՆ, 12 նոյեմբերի. /Նովոստի–Արմենիա/. «Շանթ 2015» ռազմավարական հրամանատարաշտաբային զորավարժությունները հասել են իրենց նպատակին, ասաց Հայաստանի նախագահ Սերժ Սարգսյանն Ազգային անվտանգության խորհրդի նիստում։

Նիստում հանգամանորեն քննարկվել և ամփոփվել են սեպտեմբերի 3-ից 6-ը համապետական մասշտաբով անցկացված «Շանթ-2015» ռազմավարական հրամանատարաշտաբային զորավարժությունների արդյունքները՝ զորավարժության սցենարով նախատեսված հիմնական նպատակներին հասնելու ուղղությամբ կատարված աշխատանքները, արձանագրված ձեռքբերումներն ու նկատված բացթողումները, բոլոր գերատեսչությունների ներգրավմամբ պետական կառավարման համակարգի՝ որպես մեկ միասնական մարմնի, գործողությունների համակարգվածությունն ու գործունեության արդյունավետության աստիճանը:

Զեկույցներով հանդես են եկել զորավարժությունների շտաբի պետը և նրա տեղակալները։

Հայաստանի նախագահի խոսքով, հրամանատարաշտաբային զորավարժությունների անցկացման տրամաբանությունը շատ պարզ է, և դա հանդիսանում է շարունակությունն այն աշխատանքի, որը վերջին տարիներին իրականացնում են պետական կառավարման մարմինները՝ հակառակորդի հնարավոր ագրեսիային կազմակերպված դիմագրավելու ուղղությամբ:

 Պետության ղեկավարը նշեց, որ նման զորավարժություններ ավելի փոքր ծավալով անցկացվել են 2008 և 2013 թվականներին, բայց «Շանթ 2015» զորավարժություններն անցկացվեցին ողջ ծավալով և, անշուշտ, աննախադեպ էին:

«Դուք նաև տեղյակ եք, որ գոյություն ունի կարգադրություն, համաձայն որի, սահմանված է տարբեր տիպի զորավարժությունների անցկացման պարբերականություն, և մենք բոլորս պարտավոր ենք այդ պարբերականությունը պահպանել»,– ասաց նախագահը։

Նրա խոսքով, յուրաքանչյուր զորավարժություն առնվազն երեք նպատակ է հետապնդում՝ ստուգել, կատարելագործել և փորձ ձեռք բերել: «Յուրաքանչյուր զորավարժություն, անշուշտ, ունի նաև հատուկ նպատակներ, և գոնե նախնական եզրակացություններով՝ «Շանթ-2015» ռազմավարական հրամանատարաշտաբային զորավարժությունն անցել է կազմակերպված ու հասել է իր նպատակներին»,– եզրափակեց Սարգսյանը։ -0-