Սամվել Բաբայանի ձերբակալությունը կապված է նրա՝ ՕՐՕ դաշինքին սատարելու հետ

ԵՐԵՎԱՆ, 23 մարտի. /Նովոստի-Արմենիա/. Լեռնային Ղարաբաղի Հանրապետության պաշտպանության նախկին նախարար Սամվել Բաբայանի ձերբակալությունը կապված է նրա՝ «Օհանյան-Րաֆֆի-Օսկանյան» դաշինքին սատարելու հետ, նա քաղբանտարկյալ է, վստահ է դաշինքի առաջնորդներից մեկը, «Ժառանգություն» կուսակցության ղեկավար Րաֆֆի Հովհաննիսյանը:

«Բաբայանը ձերբակալվել է իր քաղաքացիական և քաղաքական հայացքների համար, քանի որ մեր դաշինքի կողմնակից է և, արժեք լինելով, զսպում է թշնամուն»,- հինգշաբթի լրագրողներին ասաց Հովհաննիսյանը:

«Ժառանգության» առաջնորդն ընդգծեց, որ «Օհանյան-Րաֆֆի-Օսկանյան» դաշինքը ստանձնում է մինչև վերջ գեներալ Բաբայանի իրավունքները պաշտպանելու պարտավորությունը:

Հովհաննիսյանը նաև համոզմունք հայտնեց, որ դաշինքի առաջնորդ, Հայաստանի պաշտպանության նախկին նախարար Սեյրան Օհանյանը նույնպես հետապնդվում է իշխանությունների կողմից:

Արցախի պաշտպանության բանակի նախկին հրամանատար, Արցախի պաշտպանության նախկին նախարար Սամվել Բաբայանը մարտի 22-ին ձերբակալվել է մաքսանենգ եղանակով Հայաստանի Հանրապետություն «Իգլա» տեսակի զենիթահրթիռային համալիր տեղափոխելու փաստի առթիվ հարուցված քրեական գործի շրջանակում։ -0-