Reuters-ը #ElectricYerevan–ի հայտնի լուսանկարը ներառել է 2015 թ.–ի լավագույն լուսանկարների ընտրանու մեջ

ԵՐԵՎԱՆ, 9 դեկտեմբերի. /Նովոստի–Արմենիա/. Աշխարհի առաջատար լրատվական գործակալություններից մեկը` Reuters–ը, 2015 թ.–ի լավագույն լուսանկարների իր ընտրանու մեջ է ներառել հայտնի լուսանկարը, որն արվել է Երևանում էլեկտրաէներգիայի թանկացման դեմ բողոքի ամառային ակցիաների ժամանակ։

Photolure գործակալության լուսանկարիչ Վահրամ Բաղդասարյանի արված լուսանկարում պատկերված է էլեկտրաէներգիայի թանկացման դեմ շարժման ակտիվիստներից մեկը ջրցան մեքենաների կիրառմամբ ցուցարարներին ցրելու ժամանակ։

Հատկանշական է, որ բազմաթիվ առաջատար միջազգային ԶԼՄ–ներ օգտագործել են հենց այս լուսանկարը այս տարվա ամռանը Բաղրամյան պողոտայում ընթացող բողոքի ակցիաները լուսաբանելու ժամանակ։

Ամռանը Երևանում անցկացվում էին բողոքի զանգվածային ակցիաներ, որոնք առաջացել էին կարգավորիչի որոշման պատճառով,  ըստ որի` օգոստոսի 1–ից էլեկտրաէներգիայի սակագինը պետք է ավելանա մոտ 16,7 տոկոսով։ Մասնավորապես, «Ոչ թալանին» քաղաքացիական շարժման ներկայացուցիչները հունիսի 19–ին Բաղրամյան պողոտայում կազմակերպում էին հանրահավաքներ։ Հունիսի 23–ին, վաղ առավոտյան, ոստիկանները, կիրառելով ջրցան մեքենաներ, ցրեցին խաղաղ ակցիայի մասնակիցներին, որոնք շարժվում էին դեպի նախագահի նստավայր։ Ակցիան վերսկսվեց նույն օրը և տևեց ևս մի քանի շաբաթ։–0–