ԵՐԵՎԱՆ, 22 մարտի. /Նովոստի-Արմենիա/. Երևանի քաղաքապետարանը ներկայացրել է «Հաղթանակ» զբոսայգու վերակառուցման նոր նախագիծ քաղաքային տնտեսության զարգացման և ներդրումների ծրագրի շրջանակում։
Ինչպես «Նովոստի–Արմենիա» գործակալությանը հայտնեց քաղաքապետարանի մամուլի խոսնակ Հակոբ Կարապետյանը, այս պահին առկա է այգու վերակառուցման միայն կոնցեպտուալ (էսքիզային) ծրագիրը, և ներդրողներ են փնտրում։
«Այս ներդրումային առաջարկը քաղաքի տեսքի վերափոխման նախագծերից ընդամենը մեկն է, այսպես կոչված, «քաղաքի երազանք», որը կարող է իրագործվել միայն ներդրողի առկայությամբ»,– ասաց Կարապետյանը։
Փաստաթղթերի համաձայն, այգու վերակառուցման արժեքը կկազմի 30 մլրդ դրամ (շուրջ $61 մլն), շինարարությունը կտևի մոտ 3 տարի։
«Հաղթանակ» զբոսայգու տարածքի վերակառուցման և արդիականացման ծրագրի հիմնական նպատակն է ինչպես Երևանի բնակիչների, այնպես էլ զբոսաշրջիկների համար ստեղծել 21-րդ դարին համահունչ ոճային և թեմատիկ հարուստ լուծումներով մի վայր՝բոլոր տարիքային խմբերի համար, որտեղ միաձուլված են լինելու հանգստի, ժամանցի և զվարճանքի բոլոր երեք տարրերը։
Վերակառուցման և արդիականացման ծրագրում հատուկ ուշադրություն է դարձվելու Հայաստանի պատմությանը, ավանդույթներին և առասպելներին առնչվող բաղադրիչներին։
Ծրագրով նախատեսված է կառուցել այգու հասարակական և վճարովի գոտիներ: Վճարովի գոտում ստեղծվելու է ամֆիթատրոն, ժամանակակից մանկական խաղահրապարակներ, ատրակցիոններ, կախարդական այգի և զվարճանքի յուրահատուկ կառույցներ: Հասարակական գոտում նախատեսվում է իրականացնել տարածքի կանաչապատում, այգիների և ճեմուղիների արդիականացում: Այգու ենթակառուցվածքները կնախատեսվեն այնպես, որ այն հնարավոր լինի շահագործել տարվա բոլոր եղանակներին:
Հաղթանակ զբոսայգու տարբերակող առանձնահատկություններից է լինելու նաև 21-րդ դարի ինտերակտիվ ուսումնական բաղադրիչների կիրառությունը։ Արդյունքում այգու բոլոր այցելուները հնարավորություն կունենան օգտվելու տեղեկատվական համակարգերից։
Ծրագիրը նախատեսվում է իրականացնել մասնավոր ներդրումների ներգրավմամբ: Երևանի քաղաքապետարանը ներդրողին կաջակցի հողատարածքների իրավական կարգավիճակի մասին տեղեկատվության տրամադրման, ծրագրի իրականացման համար անհրաժեշտ փաստաթղթերի ձեռքբերման գործում: Երևանի քաղաքապետարանը կդիտարկի նաև հողատարածքների օգտագործման վարձավճարների արտոնյալ կարգի հաստատման հնարավորությունը և պայմանները: Երևանի քաղաքապետարանը կաջակցի նաև իրացման ծրագրի կազմման և գործընթացի կազմակերպման գործում:
«Հաղթանակ» զբոսայգին բացվել է 1950 թվականի նոյեմբերի 29–ին, սակայն դրա կառուցումը սկսվել էր դեռևս նախորդ դարի 30–ականների վերջին։ Զբոսայգու ընդհանուր մակերեսը կազմում է 270 հազար քմ։ -0-
