ԵՐԵՎԱՆ, 17 հոկտեմբերի. /Նովոստի–Արմենիա/. Հայաստանի վարչապետ Նիկոլ Փաշինյանը կարևորել է Ryanair լոուքոսթերի մուտքը հայկական շուկա։
«Կարևոր իրադարձություն է Հայաստանի քաղաքացիական ավիացիայի համար։ Եվրոպայի ամենախոշոր ավիաընկերությունը` Ryanair–ը, որոշում է կայացրել մտնել հայկական շուկա։ Ինձ զարմացրեց, որ արդեն երեկվանից վաճառքում տոմսեր կան։ Որքան հասկացա, այժմ կարելի է Երևանից Հռոմ կամ Միլան տոմս ձեռք բերել 30-56 եվրոյով»,– ասաց Փաշինյանը։
Ինչպես պարզաբանեց փոխվարչապետ Տիգրան Ավինյանը, ավիաընկերությունը չորս ուղղություն է բացում Հայաստանից, որից երեքը` Երևանից` Բեռլին, Հռոմ, Միլան, և մեկը Գյումրիից` Մեմինգեն (Մյունխենի մոտ)։
«Ընկերության գնային քաղաքականությունը միտված է առավելագույնս էժան և հասանելի տոմսեր առաջարկելուն։ Ես հենց նոր դեպի Հռոմ հունվարի 28–ի համար տոմսեր գտա` դրանք արժեն 35.88 եվրո մեկ ուղղությամբ և նույնքան` հետադարձ։ Փաստորեն 70 եվրոյով կարելի է գնալ Հռոմ և վերադառնալ»,– ասաց Ավինյանը։
Նա նշեց նաև, որ, ինչպես բոլոր լոուքոսթերներում, ուղեբեռի կամ սննդի համար պետք կլինի վճարել, կարելի է նաև այլ վճարվող ծառայություններ ստանալ։
Փոխվարչապետն ընդգծեց, որ նման ընկերությունների մուտքն էապես ազդում է ոչ միայն ներգնա, այլ նաև արտագնա զբոսաշրջության վրա և հնարավորություն է ընձեռում բազմաթիվ քաղաքացիների ճամփորդել Եվրոպա։
Загружается новость ...
"Право"
«Կարծում եմ, որ դա դրական կանդրադառնա զբոսաշրջության զարգացմանը։ Շուտով մենք ևս մեկ նորություն կներկայացնենք այս ոլորտում, որն արդեն համաձայնեցվել է»,– ասաց Ավինյանը։
Այս կապակցությամբ վարչապետը չափազանց կարևորեց այդ իրադարձությունը, ընդգծելով, որ հարցի լուծման համար կառավարությունում մի քանի անգամ ակտիվ քննարկումներ են անցկացվել, և կարևոր դեր է խաղացել «Զվարթնոց» օդանավակայանը, որը գործընկերային դիրքորոշում է արտահայտել հարցը լուծելու համար։
Նա հիշեցրեց, որ կառավարությունը սկզբունքային որոշում է կայացրել, որի համաձայն, վերջին տարիներին չսպասարկված բոլոր ուղղություններով և այն ուղղություններով, որոնցով թռիչքներ կիրականացվեն, կհանվի օդի հարկը։ Դա վերաբերում է առանց բացառության բոլոր ավիաընկերություններին։
Նա կարևորեց կառավարության ռազմավարական մոտեցումներում հետևողական քաղաքականությունը և կոչ արեց կառավարության անդամներին անիմաստ խոսակցություններով չզբաղվել, այլ հասնել դրված նպատակներին։
P.S. Փաշինյանը Facebook–ի իր էջում հրապարակել է Հռոմի տոմսերի իր որոնման արդյունքները։ -0-