ԵՐԵՎԱՆ, 22 հուլիսի. /Նովոստի-Արմենիա/. Հայկական խորհրդարանի ընդդիմադիր պատգամավոր Նիկոլ Փաշինյանը, ելույթ ունենալով իր կողմնակիցների առջև ոստիկանական գրավված շենքի տարածքում, բացառապես խաղաղ պայքարի կոչ է արել։
Նա ընդգծել է, որ պատրաստ է անել այն ամենը, ինչ կորոշի ժողովուրդը, բայց այդ որոշումը պետք է լինի հստակ, ոչ երկիմաստ, ակնհայտ և կասկածների տեղիք չտա։
Իր ելույթի սկզբում Փաշինյանը քննադատել է իր նախկին համախող, Հայաստանի առաջին նախագահ Լևոն Տեր-Պետրոսյանին, ով հինգշաբթի ասել էր, թե այսօր ժամանակը չէ պարզելու ոստիկանության շենքի զավթման պատճառները, այլ պետք է իրավիճակից դուրս գալու ուղիներ փնտրել։
«Եթե այդ հայտարարությունն աներ քաղաքագիտության ֆակուլտետի առաջին կուրսի ուսանող, ես չէի զարմանա, բայց նմանատիպ հայտարարություն լսել առաջին նախագահի շուրթերից առնվազն տարօրինակ է։ Ասել «պետք չէ հասկանալ հիվանդի տառապանքի պատճառը, եկեք բուժենք՝ հետո հասկանանք» նշանակում է, «թող հիվանդը մեռնի, և մենք ամեն ինչ կպարզենք դիահերձումից հետո»»,- ասել է Փաշինյանը՝ դա ամոթալի հայտարարություն համարելով։
Պատգամավորի խոսքով, Տեր-Պետրոսյանը միավորվել է պետության ներկայիս նախագահ Սերժ Սարգսյանի հետ ղարաբաղյան հակամարտության հարցում իրագործելու համար մի ծրագիր, որը դիվանագիտական օղակներում հայտնի է որպես «Լավրովի ծրագիր»։
Փաշինյանն ընդգծել է, որ դրանով իսկ Տեր-Պետրոսյանը ցանկանում է օգնել Սերժ Սարգսյանին՝ ապացուցելու համար, որ Ղարաբաղի հարցում իր դիրքորոշումը 1997-1998 թվականներին ճիշտ էր։
Նա հայտնել է նաև, որ իր քաղաքական օրակարգի առաջնահերթ խնդիրը Սերժ Սարգսյանի հրաժարականն է։
«Բայց միայն ժողովուրդն իրավունք ունի լուծելու այդ հարցը»,- ընդգծել է Փաշինյանը։
Հուլիսի 17–ին` լուսադեմին, մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահում են այնտեղ գտնվող անձանց, որոնց թվում են` ՀՀ փոխոստիկանապետ Վարդան Եղիազարյանն ու Երևանի փոխոստիկանապետ Վալերի Օսիպյանը, ովքեր գնացել են այնտեղ բանակցություններ վարելու համար։ Հարձակման ժամանակ զոհվել է գնդապետ Արթուր Վանոյանը, տարբեր վիրավորումներով հոսպիտալացվել է 6 մարդ` 5 ոստիկան և մեկ հարձակվող։ Չորեքշաբթի օրվա դրությամբ գրավված շենքից ազատ է արձակվել հինգ պատանդ։
ՊՊԾ գնդի շենքը զավթած անձինք պահանջում են ազատել Ժիրայր Սեֆիլյանին, ով կալանավորվել է շուրջ մեկ ամիս առաջ մի խումբ անձանց կողմից զենք ապօրինի պահելու կասկածանքով։
Հինգշաբթի լուսադեմին ոստիկանության աշխատակիցների և ցուցարարների միջև տեղի ունեցած բախումների հետևանքով տարբեր բժշկական հաստատություններ են դիմել 51 տուժածներ, որոնցից 29–ը` ոստիկան։ 16 ցուցարարի նկատմամբ հարուցվել է քրեական գործ։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում