ԵՐԵՎԱՆ, 4 օգոստոսի./Նովոստի–Արմենիա/. Հայաստանի որոշ զորամասերում արդեն սկսել է գործել սննդի կազմակերպման նոր համակարգ։
ՀՀ վարչապետ Նիկոլ Փաշինյանը Facebook–յան իր էջում լուսանկար է հրապարակել, որում երևում է, որ զինվորներից մեկը ճաշարանում ուտելուց հետո յուրահատուկ կերպով շնորհակալություն է հայտնել։
«Այս ափսե-գրառումը իրենց զորամասի ճաշարարանում թողել են Գեղարքունիքի մարզի N զորամասի զինվորները: Լուսանկարը քիչ առաջ ինձ ուղարկեց Պաշտպանության նախարար Դավիթ Տոնոյանը», – նշել է Նիկոլ Փաշինյանը։
Վարչապետը նաև ավելացրել է, որ զինվորների սննդի կազմակերպման նոր համակարգը այս պահին ներդրված է 8 զորամասում: Ծառայությունը մատուցվում է 6 տարբեր ընկերությունների կողմից: Նոր համակարգի ներդրման գործընթացը շարունակվում է:
ՀՀ վարչապետը նաև տեսանյութ է հրապարակել `նշելով, որ նոր Հայաստանը այսպես է կերակրում իր զինվորներին և այս գործընթացը հետևողականորեն շարունակվում է. ևս մեկ զորամաս անցավ զինվորների սննդի նոր համակարգին:
«Այս թեմայով իմ հրապարակած նախորդ տեսանյութի համեմատ նորությունն այն է, որ խոհանոցային սարքավորումներն ավելի արդիական են իսկ «իշաոտնուկներն» այստեղ արդեն իսկ փոխարինված են նոր աթոռներով», – նշել է ՀՀ վարչապետը։–0–