Մեկ քննություն և 100 դիմորդ․ ԿԳՄՍՆ-ն ներկայացրել է դպրոցականների մեդալ ստանալու ընթացակարգը

ԵՐԵՎԱՆ, 7 մայիսի․ /Նովոստի-Արմենիա/․ Մեդալի հավակնորդ բոլոր շրջանավարտներն այս տարի կհանձնեն քննություն, որին կմասնակցի շուրջ 100 հավակնորդ՝ Երևանից և ՀՀ բոլոր մարզերից։ Այս մասին հայտնում է ՀՀ կրթության, գիտության, մշակույթի և սպորտի նախարարության մամուլի ծառայությունը։

Մեդալի հավակնորդները քննություն կհանձնեն միայն Մաթեմատիկա առարկայից հունիսի 25-ին՝ պահպանելով սանիտարական համապատասխան նորմերը։

Քննությունը բարեհաջող հաղթահարելու դեպքում հավակնորդները կստանան մեդալ, իսկ եթե դիմորդ են, ապա հավասար միավորների դեպքում նաև առավելություն կունենան բուհեր ընդունվելու համար։

Եթե սովորողը «Մաթեմատիկա» առարկան ընտրել է որպես միասնական քննություն, ապա գերազանցության մեդալ տրամադրելիս հիմք է ընդունվում միասնական քննության արդյունքը:

Մարտի 13-ից հայկական դպրոցականները դասընթացների չեն հաճախում, իսկ մարտի 16-ից իշխանությունները երկրում մեկ ամսով արտակարգ դրություն հայտարարեցին, որը հետագայում երկարաձգվեց մինչև մայիսի 14-ը: Արտակարգ դրություն սահմանելուց որոշ ժամանակ անց, ԿԳՄՍՆ պաշտոնյաների և ուսուցիչների ջանքերով դպրոցականների համար կազմակերպվել է հեռավար ուսուցման ձևաչափ՝ տարբեր կայքերի միջոցով:

Ինչպես ավելի վաղ տեղեկացրել էր ՀՀ կրթության, գիտության, մշակույթի և սպորտի նախարար Արայիկ Հարությունյանը, Հայաստանի դպրոցների, քոլեջների և ուսումնարանների 12-րդ դասարաններում ավարտական քննություններ չեն անցկացվի , և տարեկան գնահատականները կամփոփվենմինչև մարտի 13-ը նշանակված և էլեկտրոնային օրագրեր փոխանցված գնահատականների հիման վրա: Այս գնահատականները կդիտարկվեն որպես քննական: -0-