ԵՐԵՎԱՆ, 23 փետրվարի. /Նովոստի–Արմենիա/. Հրապարակախոս, Ռուսաստանի միջազգային իրավունքի ասոցիացիայի անդամ Դենիս Դվորնիկովը կարծում է, որ ռուս–իսրայելցի բլոգեր Ալեքսանդր Լապշինը բոլորին վնասել է։
«Բանտում գտնվող մարդու բարեխղճությանը կասկածելն այդքան էլ ճիշտ չէ, բայց, այնուամենայնիվ, կարծում եմ, որ բլոգեր Ալեքսանդր Լապշինը բոլորիս «քաշել է»։ Նա վնասել է բոլորին, ում համար Արցախը մեծ հետաքրքրություն և ազգային կապվածություն ներկայացնող վայր է։ Ես չեմ հասկանում, թե ինչով էր առաջնորդվում, երբ հատում էր սահմանը։ Ես, օրինակ, «սև ցուցակում եմ», և անգամ մտքովս չի անցնի ավելորդ անգամ բարկացնել Ադրբեջանի ղեկավարությանը»,– հինգշաբթի ասաց Դվորնիկովը «Նովոստի–Արմենիա» մամուլի կենտրոնում։
Загружается новость ...
"Право"
Նա ավելացրեց, որ Լապշինի հետ կապված իրավիճակը որոշակի դիտավորյալ ակցիա էր, որն ուղղված էր բացասական արձագանք առաջացնելուն։ «Իմ կարծիքով, այս հարցն այդքան էլ միանշանակ չէ, պետք է դրան հետևել և զերծ մնալ հապճեպ հետևություններ անելուց»,– նշեց Դվորնիկովը։
Խոսելով Հայաստանում Լապշինի հետ կապված հակաբելառուսական տրամադրությունների մասին` ռուս հրապարակախոսն ընդգծեց, որ անհրաժեշտ է ձեռնպահ մնալ կոշտ քայլերից։
«Կարծում եմ` կանցնի երկու տարի, և հարկ կլինի վերականգնել հարաբերությունները։ Այնպես որ չարժե այսօր չափազանց խորը սպիներ թողնել հարաբերությունների վրա։ Կարող եմ ասել, որ ՀԱՊԿ շրջանակում հայկական պատվիրակությունը, բացի ռուսականից, բոլորից լավ է «լեզու գտնում» բելառուսների հետ, գոնե այն պատճառով, որ նրանք ընդհանուր աշխարհայացքի կրող են»,– ավելացրեց Դվորնիկովը։
Загружается новость ... "Лево"
Հրապարակախոսի կարծիքով, տվյալ իրավիճակի լավագույն պատասխանը Մինսկում Հայաստանին նվիրված մի շարք միջոցառումների (կլոր սեղաններ և այլն) անցկացումը կլիներ։
Բելառուսի նախագահ Ալեքսանդր Լուկաշենկոն փետրվարի 3–ին Մինսկում ասուլիսի ժամանակ պահանջել է հնարավորինս արագ կատարել դատարանի վճիռը և արտահանձնել Լապշինին, քանի որ ըստ Լուկաշենկոյի` այդ որոշումն օրինական է։ Նրա խոսքով, Բաքուն այդ հարցով դիմել է ոչ թե Մինսկին, այլ` Ինտերպոլին:
Փետրվարի 7-ին Բելառուսի Գերագույն դատարանը մերժել է բլոգեր Ալեքսանդր Լապշինի բողոքը, որով նա բողոքարկում էր իրեն Ադրբեջանին արտահանձնելու որոշումը։ Ուշ երեկոյան հայտնի դարձավ, որ բլոգերը հատուկ չվերթով Մինսկից տեղափոխվել է Բաքու։
Դեկտեմբերի կեսերին Իսրայելի քաղաքացի Լապշինը, ով նաև ՌԴ քաղաքացի է, գրել է, որ իրեն ձերբակալել են Մինսկում` Ադրբեջանի հայցով, որտեղ նա ներառված է «սև ցուցակում»` առանց ադրբեջանական իշխանությունների համաձայնության Լեռնային Ղարաբաղ այցելելու համար: -0-
