Կարեն Կարապետյանը հանդես է եկել ուղերձով և կոչ է արել չքաղաքականացնել ապրիլի 24–ը

ԵՐԵՎԱՆ, 23 ապրիլի./Նովոստի–Արմենիա/. Հայաստանի վարչապետի պաշտոնակատարԿարեն Կարապետյանը հանդես է եկել ուղերձով` ստեղծված իրավիճակից շուրջ և խնդրել է չքաղաքականացնել ապրիլի 24–ը։

«Բոլորս շատ լավ գիտենք՝ ինչ է կատարվում մեր երկրում: Մենք մի իրավիճակում ենք, երբ պետք է գտնենք լուծում»,– ասել է Կարապետյանը կառավարության արտահերթ նիստում։

Այդ կապակցությամբ Կարապետյանը կոչ է արել գործադիր իշխանության բոլոր մարմիններին, նախարարություններին և գերատեսչությունների աշխատակիցներին, պետական ծառայողներին:

«Բոլորը մեր երկրում ակնկալում են, որ մենք անխափան շարունակելու ենք մեր բնականոն աշխատանքը: Այդ աշխատանքի որևէ խափանում չպետք է լինի, և դա պետք է լինի մեր պետականության հասունության ամենակարևոր քննությունը: Վստահ եմ, որ մենք բոլորս այն պատվով կկատարենք»,– ասել է նա։

Վարչապետի պաշտոնակատարը կոչ է արել պաշտպանության նախարարին և բոլոր զինվորականներին դրսևորել առավելագույնս զսպվածություն։


«Իրավապահ մարմինների աշխատակիցներին խնդրում եմ, որ ցուցաբերեն առավելագույն զգոնություն, շարունակեն հետևել օրինականությանը և հանրային կարգուկանոնի պահպանմանը: Տեղի ունեցող քաղաքական զարգացումները չպետք է որևիցե կերպ ազդեն մեր բնականոն կյանքի ընթացքի վրա»,– նշել է նա։

Կարապետյանը դիմել է նաև համաքաղաքացիներին, բոլոր քաղաքական ուժերին՝ ցուցաբերել մաքսիմալ զգոնություն և օրինապաշտություն, հարգանք այլ քաղաքացիների իրավունքների հանդեպ:

«Վաղը ապրիլի 24-ն է: Չափազանց կարևոր օր է մեզ համար, և ես կոչ եմ անում բոլոր քաղաքական ուժերին վաղը այն ապաքաղաքականացնել, որպեսզի կարողանանք պատվով մեր հարգանքի տուրքը տալ։ Մենք կանգնած ենք խնդրի առջև, որ ամբողջ աշխարհին պետք է ցույց տանք, որ մենք կրիտիկական պահերին կարող ենք համախմբվել, հավաքվել, բանակցել և տրամաբանական լուծումներ գտնել»,– շեշտել է Կարեն Կարապետյանը։ -0-