ԵՐԵՎԱՆ, 3 մայիսի./Նովոստի-Արմենիա/. Հրապարակվել է արտակարգ դրության ժամանակ պարետ Տիգրան Ավինյանի նոր որոշումը՝ մայիսի 4-ից ազատ տեղաշարժի և տնտեսական գործունեության սահմանափակումների մասով նոր փոփոխությունների վերաբերյալ: Որոշումը հրապարակվել է ՀՀ կառավարության պաշտոնական կայքում:
Загружается новость ... "Лево"
«Մայիսի 4-ից նոր փոփոխություններ են տեղի ունենալու արտակարգ դրության ընթացքում կիրառվող սահմանափակումներում»,- նշել է Տիգրան Ավինյանն իր Facebook-յան էջում:
Տեղաշարժի սահմանափակումների մասով պարետը, մասնավորապես, հայտնել է, թե ինչ փոփոխություններ են սպասվում՝
-
Հանվում են ազատ տեղաշարժման սահմանափակումները, այսինքն տեղաշարժման թերթիկի կարիք այլևս չի լինի,
-
Շարունակում է գործել հանրային տրանսպորտի արգելքը,
-
Արդեն իսկ հանվել էին միջմարզային սահմամնափակումները: Այս մոտեցումը պահպանվում է,
-
Փոխարենը՝ վարակի տարածումից կամ օջախային լինելու ռիսկից կախված՝ կարող է ժամանակավորապես փակվել առանձին համայնքների ելումուտը,
Տնտեսական գործունեության սահմանափակումների մասով՝ արդեն գործող տեսակներին ի լրումն թույլատրվում են՝
-
Ամբողջ մշակող արդյունաբերությունը, այդ թվում՝ տեքստիլը, կահույքը, կոշիկը, պոլիգրաֆիան և այլն,
-
Շինարարության ավարտական փուլի աշխատանքները,
-
Մեծածախ և մանրածախ առևտուրը, սակայն՝ միայն մասնագիտացված ու ոչ մասնագիտացված խանութներում ու կրպակներում: Մոլերը, առևտրի կենտրոնները և շուկաները շարունակում են փակ մնալ, դրանցում կարող են գործել միայն սննդամթերքի ու գյուղատնտեսական արտադրանքի վաճառքի կետերը, դեղատները,
-
Հանրային սննդի կազմակերպման մասով՝ ռեստորանների, բարերի, սրճարանների, պանդոկների գործունեությունը բացառապես բացօթյա տարածքում,
-
Տեղեկատվության և կապի ոլորտն ամբողջությամբ,
-
Բուսաբանական և կենդանաբանական այգիների ու բնության հատուկ պահպանվող տարածքների, արգելոցների գործունեությունը,
-
Սպորտային ակումբների ու օբյեկտների գործունեությունը՝ բացառապես պրոֆեսիոնալ մարզիկների մասնակցությամբ սպորտային միջոցառումների անցկացման և մարզումների իրականացման համար:
-
Անհատական ծառայություններից՝ լվացման, մաքրման և չոր մաքրման ծառայությունները, վարսավիրանոցների, գեղեցկության սրահների, մարմնի խնամքի ծառայությունները:
Պարետը նաև ներկայացրել է կանոնները, որոնք անհրաժեշտ է պահպանել սահմանափակումների մեղմացումներից հետո:
«Զուգահեռաբար բոլոր թույլատրված ոլորտների համար գործում են գործունեության կազմակերպման պարտադիր կանոններ, որոնք չպահպանելը հանգեցնում է օրենքով սահմանված պատասխանատվության միջոցների կիրառմանը: Միաժամանակ, ուժեղացվելու է վերահսկողությունը կանոնների պահպանման նկատմամբ»,- նշել է նա:
Առավել մանրամասն փոփոխություններին ու նոր կանոններին կարող եք ծանոթանալ որոշման մեջ՝ https://www.gov.am/files/docs/4038.pdf
Նաև պարետը հայտնել է, որ սահմանափակումների մեղմումը չի նշանակում, թե համավարակի վտանգն անցել է:
«Սա փորձ է` ադապտացվելու համակեցության նոր կանոններին: Հետևապես, այս փուլում չափազանց կարևոր է յուրաքանչյուրիս անհատական, սոցիալական և կորպորատիվ պատասխանատվությունը։ Սա յուրահատուկ թեստ է բոլորիս համար, թե որքանով ենք կարողանում բարձր գիտակցություն և կարգապահություն դրսևորել»,- նշել է Ավինյանը:
Նա ընդգծել է նաև, որ իրավիճակի վատթարացման դեպքում ամեն պահի կարող է վերադարձ կատարվել առավել խիստ սահմանափակումների ռեժիմի։
Հայաստանում մարտի 16–ին մեկ ամսով հայտարարվել էր արտակարգ դրության ռեժիմ կորոնավիրուսի տարածումը կանխելու նպատակով։ Մարտի 24–ից ապրիլի 12–ը գործում էին մարդկանց տեղաշարժի և տնտեսական գործունեության սահմանափակումներ։ Ապրիլի 13–ին կառավարությունը որոշեց մեկ ամսով երկարացնել արտակարգ դրության ռեժիմը` մինչև 2020թ.–ի մայիսի 14–ը ժամը 17։00–ն։
Մայիսի 3-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 2386 դեպք, որոնցից 1035-ն` առողջացած, 35-ը` մահվան ելքով: Կորոնավիրուսային հիվանդությամբ այս պահին փաստացի բուժում է ստանում 1312 պացիենտ: Ընդհանուր առմամբ, կատարվել է 24177 թեստավորում:-0-