ՀՀ կառավարության աշխատակազմի ղեկավար նախարարի նկատմամբ պատժամիջոցներ են կիրառվում

ԵՐԵՎԱՆ, 6 հոկտեմբերի. /Նովոստի–Արմենիա/. Հայաստանի վարչապետ Կարեն Կարապետյանը Դավիթ Հարությունյանին իջեցրել է իր աստղային բարձունքից և հասկացրել, որ վունդերկինդների ժամանակներն անցել են, գրում է «Հրապարակ» թերթը։

Կարապետյանը սկսել է նաև պատժամիջոցներ կիրառել Դավիթ Հարությունյանի նկատմամբ։

Պարբերականի տեղեկություններով, վարչապետը վերցրել է Դավիթ Հարությունյանին սպասարկող երկու մեքենաները և դրա փոխարեն տրամադրել «Պրադո»։

Բանն այն է, որ տարիներ ի վեր կառավարության աշխատակազմի ղեկավար-նախարարն ունեցել է երկու ծառայողական մեքենա՝ Honda CR-V BMW 523, և, նույնիսկ օպտիմալացումից հետո մեքենաների թիվը չի կրճատվել։

Վարչապետը Դավիթ Հարությունյանին զրկել է «BMW»–ից, իսկ Honda CR-V–ն էլ տվել է նրա տեղակալին։

Թերթի ունեցած աղբյուրների համաձայն, աշխատակազմի ղեկավար-նախարարին տրված նոր մեքենան անհամեմատ զիջում է նախկիններին, ինչը ոգևորություն է առաջացրել Դավիթ Հարությունյանին չսիրողների շրջանում։ -0-