Հայկական հյուրասիրություն. տղամարդը մարիխուանա է հյուրասիրել ՌԴ քաղաքացիներին

ԵՐԵՎԱՆ, 30 մարտի. /Նովոստի–Արմենիա/. Գագիկ Գրիգորյանին մեղադրանք է առաջադրվել ապօրինի կերպով մարիխուանա տեսակի թմրամիջոց պահելու համար, հայտնում է դատական տեղեկատվական համակարգը։

«Գրիգորյանը 2015թ օգոստոսին Տավուշի մարզի Արծվաբերդ համայնքի վարչական տարածքում գտնվող Մեհրաբ կոչվող հանդամասում վայրի աճած թփերից առանց իրացնելու նպատակի, ապօրինի հավաքելու միջոցով ձեռք է բերել խոշոր չափերով` 86.11գրամ կշռով մարիխուանա տեսակի թմրամիջոց և այն ապօրինի պահել Այգեձոր գյուղում գտնվող իր առանձնատանը»,– ասվում է քրեական գործի նկարագրությունում։

2015թ. հոկտեմբերին Գրիգորյանը նույն զանգվածից ապօրինի իրացրել է` իր առանձնատան բակում հյուրասիրելով ՌԴ քաղաքացիներ, եղբայրներ Արամ և Կարեն Ճաղարյաններին։

Գագիկ Գրիգորյանի նկատմամբ որպես խափանման միջոց է ընտրվել`ստորագրություն չհեռանալու մասին։ Գործով դատական քննությունը կկայանա չորեքշաբթի` մարտի 30–ին։ -0-