Հայաստանը կօգտագործի Լուսինը բացառապես խաղաղ նպատակներով, և այլ մանրամասներ

ԵՐԵՎԱՆ, 13 հուլիսի. /Նովոստի-Արմենիա/. Հայաստանի կառավարությունը հինգշաբթի նիստում հավանություն է տվել «Լուսնի և այլ երկնային մարմինների վրա պետությունների գործունեության կարգավորման մասին» համաձայնագիրը վավերացնելու մասին օրենսդրական նախաձեռնությանը:

Փաստաթուղթը ստորագրվել էր 1979 թվականի դեկտեմբերի 18-ին Նյու Յորքում:
Տվյալ համաձայնագրին միացած պետությունները պարտավորվում են Լուսինն օգտագործել բացառապես խաղաղ նպատակներով։

Օրենսդրական նախաձեռնությունը, որը մշակել է Հայաստանի ԱԳՆ–ն, սահմանված կարգով ներկայացվել է Ազգային ժողով: Ըստ այդմ` համաձայնագրի անդամ պետությունները պետք է օգտագործեն Լուսինը բացառապես խաղաղ նպատակներով։ Բացի այդ, Լուսնի վրա արգելվում է ուժի ցանկացած գործադրում, ուժի գործադրման ցանկացած սպառնալիք, թշնամական գործողություն կամ թշնամական գործողությունների սպառնալիք։

«Նմանապես, արգելվում է Լուսինն օգտագործել այդպիսի գործողություններ իրականացնելու համար, կամ ցանկացած նմանատիպ սպառնալիք ներկայացնել երկրագնդի, Լուսնի, տիեզերանավերի, տիեզերանավերի անձնակազմերի կամ մարդու կողմից ստեղծված տիեզերական օբյեկտների համար»,– ասվում է օրենքի նախաձեռնության մեջ։


Կողմ պետությունները չպետք է Լուսնի ուղեծրում կամ դեպի Լուսին կամ Լուսնի շուրջ թռիչքի այլ հետագծերի վրա տեղակայեն միջուկային զենք կամ ցանկացած այլ տեսակի զանգվածային ոչնչացման զենք. նրանք նաև չպետք է տեղակայեն կամ օգտագործեն այդպիսի զենք Լուսնի վրա կամ նրա ընդերքում։

Ըստ նախաձենռության հոդվածներից մեկի, Լուսնի վրա արգելվում է ռազմական բազաների, օբյեկտների և ամրաշինությունների հիմնումը, ցանկացած տեսակի զենքի փորձարկումն ու ռազմական զորախաղերի անցկացումը։

Գիտական հետազոտությունների համար կամ ցանկացած այլ խաղաղ նպատակներով զինվորական անձնակազմի օգտագործումը չի արգելվում։ Լուսնի հետազոտման և օգտագործման համար անհրաժեշտ ցանկացած սարքավորման կամ հարմարության օգտագործումը չի արգելվում։ -0-