ՈՒՇԱԴՐՈՒԹՅՈՒՆ. Հայաստանում ուլտրամանուշակագույն ճառագայթման մակարդակն այսօր բարձր է լինելու

ԵՐԵՎԱՆ, 30 հունիսի. /Նովոստի–Արմենիա/. Հայաստանի ԱԻ նախարարությունը նախազգուշացնում է երկրում ուլտրամանուշակագույն ճառագայթման բարձր մակարդակի մասին։

«Ուլտրամանուշակագույն ճառագայթման ինդեքսը հունիսի 30-ին կանխատեսվում է 7, որի դեպքում խորհուրդ է տրվում ժամը 11:00-ից 15:00-ն ընկած ժամանակահատվածում խուսափել արեգակի ուղիղ ճառագայթներից»,– ասվում է գերատեսչության հաղորդման մեջ։

ՈՒՄ ինդեքսը ցույց է տալիս, թե ինչ ազդեցություն է գործում մարդու օրգանիզմի վրա ՈՒՄ ճառագայթումը։ Ցուցիչի սանդղակը բաղկացած է 1–ից 11+ նիշերից, որոնք նկարագրում են ուլտրամանուշակագույն ճառագայթման մակարդակը, որը հասնում է Երկրին որոշակի ժամանակում և առողջության համար որոշակի ռիսկեր է կրում։ Տվյալ սանդղակի համաձայն, 6 և 7 ՈՒՄ ինդեքսները բարձր են համարվում։


ԱԻՆ–ը հայտնում է նաև, որ օդի ջերմաստիճանն ուրբաթ կնվազի 2-3 աստիճանով, իսկ այնուհետև նույնքան կբարձրանա։

Երևանում ուրբաթ և շաբաթ օրերին օդը կտաքանա մինչև 35-36 աստիճան, իսկ հետագա երեք օրերին օդի ջերմաստիճանը կբարձրանա մինչև 37-38 աստիճան։

Միաժամանակ հունիսի 30–ին հյուսիսային շրջաններում երեկոյան ժամերին սպասվում են կարճատև անձրևներ և ամպրոպներ, իսկ հուլիսի 1-4–ը սպասվում է առանց տեղումների եղանակ։

Քամին կլինի հարավ–արևմտյան` 3-8 մետր վայրկյան արագությամբ։ -0-