ԵՐԵՎԱՆ, 9 դեկտեմբերի. /Նովոստի–Արմենիա/. Հայաստանի վարչապետ Հովիկ Աբրահամյանը չորեքշաբթի խորհրդարանում կայացած կառավարության ժամի ընթացքում ասաց, որ իր ողջ կարողությունն ու եկամուտները հայտարարագրված են, և նա պատրաստ է նվիրել այն ամենը, ինչ դուրս կմնա այդ ցուցակից։
Ընդդիմադիր Հայ ազգային կոնգրեսի պատգամավոր Նիկոլ Փաշինյանը չորեքշաբթի հայտարարություն է կատարել, որում նշել է, որ որոշ (չստուգված) աղբյուրներով, վարչապետը շոշափելի կարողություն ունի։ Մասնավորապես, դրանք շենքեր են, բնակարաններ, գործարաններ և ձեռնարկություններ, գազա– և բենզալցակայաններ, հողատարածքներ, գյուղատնտեսական կալվածքներ, ինչպես նաև բաժնեմաս մի շարք գործող խոշոր ձեռնարկություններում։ Պատգամավորը նշեց նաև, որ, վարչապետի` 2006 թվականի հայտարարագրման համաձայն, ինքը 1.2 մլն դոլար է ստացել գյուղմթերքի իրացման համար։ Փաշինյանը կառավարության անդամներին առաջարկել է ստուգել այդ տվյալների իսկությունը։
Փաշինյանի առաջարկությանն ի պատասխան` Աբրահամյանը հայտարարել է, որ պատրաստ է նվիրել ամբողջ չհայտարարագրված կարողությունը։ Վարչապետն ընդգծել է, որ թաքցնելու ոչինչ չունի, և հայտարարագրում է ամբողջ ունեցվածքը` խորհուրդ տալով պատգամավորին զուր չվատնել ժամանակը և չշահարկել այդօրինակ անհիմն հայտարարություններ սեփական հեղինակությունը բարձրացնելու համար։
«Դուք ձեր հետաքննությունն եք անցկացրել, ինչ–որ չստուգված տվյալներ եք գտել և ամպագոռգոռ հայտարարություններ եք անում` որքանով է դա կոռեկտ, ճիշտ կամ բարոյական, թող որոշի հասարակությունը։ Կարծում եմ, որ դուք սխալվում եք, քանի որ այն ամենը, ինչ ես ունեմ, հայտարարագրված է։ Որևէ կոռուպցիոն սկանդալի մասնակից չեմ, հարստություն չեմ դիզել պաշտոնական դիրքի չարաշահմամբ»,– ասաց Աբրահամյանը։
Ինչ վերաբերում է գյուղատնտեսական արտադրանքի եկամուտներին, ապա, ինչպես նշեց վարչապետը, «այդ ծավալները չի հասկանում միայն նա, ով երբեք չի աշխատել հողի հետ, և բերքից ստացված այդ եկամուտները, ըստ նրա, պատգամավորի նշած թվերից շատ անգամներ ավելի է»։
Այդ կապակցությամբ Աբրահամյանն իր օգնությունն առաջարկեց Փաշինյանին նոր ոլորտի յուրացման հարցում, քանի որ «հաշվի առնելով թուրքական ապրանքների նկատմամբ պատժամիջոցները` լավ հնարավորություն է ստեղծվել դեպի Ռուսաստան գյուղատնտեսական բերքի արտահանում կազմակերպման համար»։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
