Գրենական պիտույքները Հայաստանում ուսումնական տարեսկզբին ընդառաջ չեն թանկացել

ԵՐԵՎԱՆ, 16 օգոստոսի. /Նովոստի–Արմենիա/. Հայաստանում գրենական պիտույքները ուսումնական տարվա սկզբին չեն թանկացել, երեքշաբթի լրագրողներին ասաց Սպառողների միության նախագահ Արմեն Պողոսյանը:

«Գրենական պիտույքների գների աճ չի գրանցվել: Սակայն բացի գրենական պիտույքներից, դպրոցականներին անհրաժեշտ այլ պարագաները, օրինակ` պայուսակները, հագուստը, սպորտային պարագաները տարվա ընթացքում թանկացել են 5 տոկոսով», - հայտնեց Պողոսյանը:

Նրա խոսքով, ընդհանուր առմամբ, Հայաստանում դպրոցական պարագաների գների աճը երեք տարում կազմել է 13 տոկոս:

«Մեր ուսումնասիրությունների համաձայն, Հայաստանում միջին վիճակագրական ընտանիքը դպրոցականներին անհրաժեշտ պարագաների վրա ծախսում է 50 հազար դրամ, ինչը ներառում է միայն անմենաանհրաժեշտ իրերը։

Ունևոր ընտանիքները, որոնք կազմում են Հայաստանի բնակչության 10-12 տոկոսը, ծախսում են 200 հազար դրամ: Նրանց համար գնաճը ոչ մի նշանակություն չունի», - նշեց Պողոսյանը:

Նա խորհուրդ տվեց դպրոցականների ծնողներին ավելի հեռատես լինել և չհետաձգել գնումները մինչ սեպտեմբերի 1-ը: -0-