ԵՏՄ նիստը կանցկացվի Երևանում առաջիկա 2-3 ամիսներին. վարչապետ

ԵՐԵՎԱՆ, 7 ապրիլի. /Նովոստի–Արմենիա/. ԵՏՄ նիստը կանցկացվի Երևանում առաջիկա 2-3 ամիսներին, ասաց Հայաստանի վարչապետ Հովիկ Աբրահամյանը ռուս գործընկեր Դմիտրի Մեդվեդևի հետ հանդիպումից հետո։

Ավելի վաղ ռուսական ԶԼՄ–ները հայտնեցին, որ գագաթնաժողովը, որը պետք է անցկացվեր Երևանում ապրիլի 8–ին, հետաձգվել էր ղազախական կողմի նախաձեռնությամբ, քանի որ այն կարող էր ընկալվել որպես ղարաբաղյան հակամարտության կողմերից մեկի սատարում։ Ավելի ուշ հայտնի էր դարձել, որ նիստը կկայանա ապրիլի 13–ին Ռուսաստանի մայրաքաղաքում։

«Հանդիպման ընթացքում մենք պայմանավորվել ենք, որ առաջիկա 2-3 ամիսներին Խորհրդի նիստը կանցկացվի Երևանում, իսկ այսօր երեկոյան մենք մանրամասն կքննարկենք իմ մասնակցության հարցը Մոսկվայի առաջիկա նիստին։ Վերջնական որոշում առայժմ չի ընդունվել»,– ասաց Աբրահամյանը։

Ինչպես ճեպազրույցում նշեց Ռուսաստանի վարչապետ Դմիտրի Մեդվեդևը, փետրվարի 1–ից աշխատանքի է անցել Եվրասիական տնտեսական հանձնաժողովի կոլեգիայի նոր կազմը, որում առաջիկա չորս տարիներին կնախագահի Հայաստանի ներկայացուցիչ, նախկին վարչապետ Տիգրան Սարգսյանը։

Նա ընդգծեց, որ, չնայած արտաքին տնտեսական բարդ պայմաններին, անհրաժեշտ է առավելագույնս ներկայացնել Եվրասիական միության ինտեգրացիոն ներուժը։

«Մենք պայմանավորվել ենք, որ համապատասխան միջոցառումներ կանցկացնի` հաշվի առնելով այն լուծումները, որոնք ընդունվել են հաջորդ շաբաթ նիստը Մոսկվա տեղափոխելու վերաբերյալ, բայց նաև հետագայում կանցկացնենք համապատասխան միջոցառում` Հայաստանում ԵՏՄ կառավարությունների ղեկավարների խորհրդակցությունը, ինչպես և պայմանավորվել էինք»,– ասաց Մեդվեդևը։ -0-