ԵՐԵՎԱՆ, 12 մայիսի. /Նովոստի-Արմենիա/. Էքստասենս Անի Մաջնունյանի սպանության մեջ մեղադրվող Մուշեղ Մխիթարյանը նախօրեին Աջափնյակ և Դավիթաշեն վարչական շրջանների ընդհանուր իրավասության դատարանում հայտարարել է, որ չի ցանկանում մասնակցել դատական նիստերին, հաղորդում է «Հայկական ժամանակ» թերթը:
«Պարոն դատավոր, ես հրաժարվում եմ նիստերին ներկայանալ, դրանք կարող են շարունակվել առանց իմ ներկայության։ Պատճառը քննչական խմբի կողմից ներկայացված շինծու մեղադրանքն է, Դուք էլ, որպես փորձառու դատավոր, պետք է ըստ արժանվույնս գնահատեիք դա։ Ես մի քանի անգամ փորձում էի հայտարարություններ և միջնորդություններ անել, ինչին Դուք ընդառաջ չգնացիք։ Քննչական խմբի հանցավոր գործունեությունը հաշվի առնելով` հասկացա, որ սխալվել եմ` վստահելով արդար դատաքննությանը։ Չեմ վստահում Ձեզ և քննիչին։ Կարծում եմ` վճիռս արդեն պատրաստ է, և Դուք պետք է փրկեք քննչական խմբին խայտառակությունից, դա ձեր ներքին համոզմամբ, ճիշտ է։ Ես իմ հարցերը կլուծեմ միջազգային չափանիշներով։ Կգա օրը, երբ եվրոպացիները ճշմարիտ որոշում կկայացնեն։ Դուք ինձ զրկում եք ազատությունից, ընտանիքից, մաղթում եմ Ձեզ նորանոր հաջողություններ և ամենայն բարիք»,- նշվում է նախօրեին տեղի ունեցած հերթական դատական նիստի ժամանակ նախագահող դատավոր Վարդան Աբրահամյանին Մուշեղ Մխիթարյանի` ուղղված նամակում, հաղորդում է թերթը։
Դատավորն այս գրությունն ընթերցելուց հետո ամբաստանյալից հետաքրքրվել է, թե պնդու՞մ է իր հայտարարությունը, ինչին ի պատասխան Մխիթարյանը նշել է, որ ոչ ինքը և ոչ էլ իր պաշտպան Մարինե Ֆարմանյանը չեն մասնակցի սույն գործով հետագա նիստերին։ «Հենց վճիռը լինի, կներկայանամ», – նետել է նա։
Թերթի տվյալներով, նախագահող դատավորը, ինչպես նաև ամբաստանյալի պաշտպանը պարզաբանել են, որ իր ցանկությամբ պաշտպանը չի կարող չմասնակցել նիստերին։ Մարինե Ֆարմանյանը դատարանից խնդրել է ժամանակ տրամադրել իր պաշտպանյալին վերջնական դիրքորոշում հայտնելու համար։ Դատավորը հնարավորություն է տվել ամբաստանյալին կրկին մտածել, գրում է թերթը։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
