ԵՐԵՎԱՆ, 12 ապրիլի. /Նովոստի–Արմենիա/. Երևանի քաղաքաշինության, բնապահպանության, հաղորդակցությունների և տրանսպորտի խորհրդում կայացել է Վերնիսաժի բարեկարգման նախագծի չորս էսքիզների քննարկումը, հայտնում է քաղաքապետարանի մամուլի ծառայությունը։
Երևանի քաղաքապետի տեղակալ Դավիթ Օհանյանն ու խորհրդի նախագահի տեղակալ, Երևանի գլխավոր ճարտարապետ Տիգրան Բարսեղյանը ներկայացրել են «Վերնիսաժի» բարեկարգման և արդիականացման ծրագրի նախնական հայեցակարգային մոտեցումները։
«Ծրագրի նպատակն է` ապահովել Նալբանդյան-Հանրապետության փողոցների միջանկյալ հատվածում բարեկարգված խաչքարերի պուրակի տրամաբանական շարունակությունը մինչև Խանջյան փողոց՝ չխաթարելով «Վերնիսաժի» աշխատանքը»,– ասվում է հաղորդման մեջ։
Քաղաքապետարանը ծրագրում է վերածել Վերնիսաժը հուշանվերների, զարդեղենի և արվեստի նմուշների վաճառքի, ինչպես նաև զբոսաշրջիկների զբոսանքի հարմարավետ վայրի` ապահովելով հաճելի ժամանցի պայմաններ։ Խորհրդի նիստում որոշվել է բացառել քարե կամ բետոնե շինությունների կառուցումը, ինչպես նաև կանաչ տարածքներում ինչ–որ շինությունների տեղադրումը։
«Արդիականացման շնորհիվ, Վերնիսաժը կապահովվի ոռոգման նոր ցանցով, լուսավորությամբ, ժամանցի համակարգով»,– նշվում է հաղորդման մեջ։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
