Եղանակային անկայունություն Մայրության և գեղեցկության տոնին

ԵՐԵՎԱՆ, 6 ապրիլի. /Նովոստի-Արմենիա/. Հայաստանի հյուսիսային շրջաններում և մայրաքաղաքում ապրիլի 7-8-ն օրվա երկրորդ կեսին, առավելապես հյուսիսային շրջաններում, 9-ին շրջանների զգալի մասում սպասվում է անձրև, հայտնում է ԱԻՆ մամուլի ծառայությունը։

Միաժամանակ, հաջորդ երկու օրերին` ապրիլի 10-11-ին անձրևները կդադարեն և կդիտվի առանց տեղումների եղանակ:

Շիրակի, Կոտայքի և Գեղարքունիքի մարզերում, Արագածոտնի և Վայոց Ձորի լեռներում ապրիլի 7-8–ին ցերեկը կլինի 11–ից 16 աստիճան տաքություն, գիշերը` 0–ից 3 աստիճան։ Նույն օրերին Լոռու և Տավուշի մարզերում օդի ջերմաստիճանը մի փոքր ավելի բարձր կլինի` ցերեկը Լոռիում 16-19 աստիճան տաքություն, գիշերը` 1-5 աստիճան տաքություն։ Տավուշում ցերեկը օդը կտաքանա մինչև +22, իսկ գիշերը ջերմաստիճանը կնվազի` կազմելով 2-7 աստիճան տաքություն։

Արագածոտնի և Վայոց Ձորի, Սյունիքի նախալեռնային շրջաններում, ինչպես նաև Արարատում, Արմավիրում և Արցախում ցերեկն օդի ջերմաստիճանը կկազմի 18-20 աստիճան տաքություն, գիշերը` 5-8 աստիճան։

Օդի ջերմաստիճանը 9-ի ցերեկը և 10-ի գիշերը կնվազի 4-6 աստիճանով:

Քամին կլինի հարավ-արևմտյան՝ 3-8 մ/վ արագությամբ: -0-