Ձյունը Հայաստանում դժվարանցանելի է դարձրել որոշ ավտոճանապարհներ. ՏԿԱԻՆ

ԵՐԵՎԱՆ, 15 հունվարի. /Նովոստի–Արմենիա/. Հայաստանի մարզերի մեծամասնությունում տեղացած առատ ձյունը դժվարանցանելի է դարձրել որոշ ավտոճանապարհներ։

Ինչպես հայտնում է Հայաստանի տարածքային կառավարման և արտակարգ իրավիճակների նախարարության կայքը, ուրբաթ առավոտյան ժամն 08։00–ի դրությամբ, փակ է եղել Վարդենյաց լեռնանցքը, որտեղ մրրիկ է, ինչպես նաև Շիրակի մարզի Աշոցքի և Ամասիայի շրջանների միջհամայնքային ճանապարհները։

Դժվարանցանելի են Սոտք–Քարվաճառ, Ապարան–Ծիլքար, Եղիպատրուշ-Քուչակ, Լանջառ-Լուսաշող ավտոճանապարհները:

Սյունիքի մարզի Գորիս և Սիսիան քաղաքներում ձյուն է տեղում:

ՃՇՇ աշխատակիցներն իրականացնում են ճանապարհների մաքրման և մշակման աշխատանքներ:
ՀՀ ՏԿԱԻ նախարարությունը վարորդներին խորհուրդ է տալիս վերոնշյալ ճանապարհահատվածներով երթևեկել միայն խիստ անհրաժեշտության դեպքում` ձմեռային անվադողերով:

Ի կատարումն ՀՀ ՏԿԱԻ նախարարի հրամանի՝ նախարարության բոլոր հերթապահ ստորաբաժանումները 2015 թ.-ի դեկտեմբերի 25-ից իրենց ծառայությունն իրականացնում են ուժեղացված ռեժիմով:

Վրաստանի ՆԳՆ ԱԻ դեպարտամենտից ստացված տեղեկատվության համաձայն` Ստեփանծմինդա-Լարս ավտոճանապարհը բաց է (բացառությամբ կցորդիչով բեռնատարների) բոլոր տեսակի տրանսպորտային միջոցների համար՝ անվաշղթաների կիրառմամբ: -0-