Դա ի՞նչ խոսալու ձև է. վարչապետը բարկացել է Տիգրան Ուրիխանյանի վրա և նրան «թոփ զրո» պատգամավոր անվանել (ՎԻԴԵՈ)

ԵՐԵՎԱՆ, 17 հունիսի./Նովոստի-Արմենիա/. Այսօր ԱԺ-ում կառավարության անդամների հետ հարցուպատասխանի ժամանակ թեժ խոսակցություն է տեղի ունեցել վարչապետի և անկախ պատգամավոր Տիգրան Ուրիխանյանի միջև, ով նախկինում եղել է «Ծառուկյան» դաշինքի մաս կազմող «Ալյանս» կուսակցության ներկայացուցիչ: 

«Միշտ մտածել եմ, որ ձեր իշխանության օրոք և պայմաններում չի կարող լինել իրավիճակ, երբ որևէ պետական կառույցի պարտավորություն քաղաքացու նկատմամբ չիրականացվի, առավել ևս որեւէ պետական կառույցի պարտավորություն որևէ քաղաքացու նկատմամբ չիրականացվի, քաղաքացին դիմի դատարան, կառույցը բողոքարկի, բայց պարտվի , քաղաքացին շահի, հետո կառույցը դիմի հաջորդ ատյան բողոքարկի նորից պարտվի, հետո դիմի երրորդ ատյան՝ պարտվի, այդ թվում Սահմանադրական դատարան եւ վերջապես արձակվի դատարանի օրինական վճիռ։ Դատական ակտերի հարկադիր կատարման ծառայության համար փաստաթուղթ արձակվի, կատարողական թերթ, որպեսզի կատարվի հարկադիր կարգով այդ պարտավորությունը, բայց էլի դա տեղի չունենա։ Այս տարվա դեռ հունվարի 22–ին, կայացել է վերջնական վճիռ, որով ՊՆ–ն պարտավորվել է սոցիալական շարժման համահիմնադիր և պահեստազորի սպաների շահերի պաշտպանությունը համակարգող, պահեստազորի մայոր Ցոլակ Խաչատրյանին փոխհատուցել իրեն օրինական կարգով հասանելիք, չվճարված արձակուրդայինները։ Մինչ օրս չի կատարվել եռաստիճան դատական գամակարգով անցած վճիռը։ Այստե՞ղ է «Top 10 of the Ministers» Պաշտպանության նախարարը, այստեղ չէ։ Կարո՞ղ է արդյոք ձեր իշխանության օրոք նման բան լինել: Քաղաքացու հանդեպ պարտավորությունը չկատարվի այն էլ օրինակա ուժի մեջ մտած վճռով»,– հարցրել է Ուրիխանյանը։

Ուրիխանյանի հարցին պատասխանել է Արդարադատության նախարար Ռուստամ Բադասյանը:

«Բուն կատարողական վարույթին ծանոթ չեմ, անպայման կծանոթանանք, կհասկանանք, թե որն է պատճառը, որ կատարողական վարույթը նման ձգձգում է ունեցել, բայց ինձ հուշեց Պաշտպանության փոխնախարարը, որ կառավարության որոշման նախագիծ կա վերաբաշխում կատարելու մասին, որը նախատեսված է հենց դատական ակտերից բխող ՊՆ պարտականությունները կատարելու հետ, այնպես, որ  կարծես թե այդ խնդիրը լուծվում է։ Մնացած մասով կուսումնասիրենք ու կտեղեկացնենք»,- նշել է նա Ուրիշխանյանի հարցին ի պատասխան:

«Էս ճի՞շտ որոշում էր, արդարադատության նախարարին բերել պատասխան տալու»,- սկսել է իր արձագանքը Տիգրան Ուրիխանյանը և նշել, որ այն ինչ որ պետությունը պետք է աներ հայրենիք, մարդու կյանք պահած սպայի նկատմամբ, չի արվել:

«Մինչև օրս ի՞նչն է քննարկվում, տվեք այդ մարդու փողերը։ Երկրորդ՝ top ten of the ministers պաշտպանության նախարարը, հարգելի պարոն վարչապետ, բա չեք իմացել ինձ ու ձեզ դատի է տվել, ինչու համար, առաջին անգամ եմ ես այդպիսի բան տեսնում»,- նշել է Ուրիխանյանը:

Ուրիխանյանի արձագանքի ժամանակ միջամտել է վարչապետը՝ նշելով, որ Ուրիխանյանը պաշտպանության մասին խոսում է որպես «թոփ զրո» պատգամավոր և ասել՝ «Դա ի՞նչ խոսալու ձև է»: -0-