Արմավիրի մարզպետի խորհրդականի սպանության սահմռկեցուցիչ մանրամասները

ԵՐԵՎԱՆ, 28 հուլիսի. /Նովոստի–Արմենիա/. Հուլիսի 25–ին «Դալարիկի ձոր» կոչվող տարածքում, հայտնաբերվել էր հուլիսի 23-ից ոստիկանության Արմավիրի բաժնի կողմից որպես անհետ կորած որոնվող, Արմավիրի մարզպետի խորհրդական, 1965 թ. ծնված Մանուկ Սիմոնյանի դին:

Նախօրեին Սիմոնյանի սպանության գործով ձերբակալվել է մեկ անձ։ Այսօր Հայաստանի ոստիկանությունը նոր մանրամասներ է ներկայացնում տվյալ գործով։


«Հուլիսի 27-ին օպերատիվ-հետախուզական և քննչական միջոցառումների շնորհիվ պարզվել է, որ հուլիսի 22-ին Մանուկ Սիմոնյանի տանը 1970 թ. ծնված Ռ. Մ.-ն կացնով բազմաթիվ հարվածներ է հասցրել նրա գլխին և սպանել, այնուհետև սավանով փաթաթել, կապել և 1994 թ. ծնված Ն. Ս.-ի հետ հուլիսի լույս 23-ի գիշերը, ժամը 4.00-ի սահմաններում, հանգուցյալին պատկանող «Մերսեդես Բենց» մակնիշի ավտոմեքենայով դիակը տեղափոխել են նշված վայր և թողնելով այնտեղ՝ հեռացել են»,– ասվում է հաղորդման մեջ։

Նշանակվել են փորձաքննություններ:

Ռ. Մ.-ն և Ն. Ս.-ն ձերբակալված են: Ըստ տեղական ԶԼՄ–ների և սոցցանցերում պտտվող լուրերի, նշված անձինք հանգուցյալ Սիմոնյանի կինն ու որդին են։

Նախաքննությունը շարունակվում է: -0-