Առաջին լրատվականի տնօրեն Գևորգ Ալթունյանն ազատվել է աշխատանքից

ԵՐԵՎԱՆ, 8 նոյեմբերի. /Նովոստի–Արմենիա/. Օրեր առաջ աշխատանքից ազատվել է Հանրային հեռուստաընկերության Առաջին լրատվականի տնօրեն Գևորգ Ալթունյանը, գրում է «Հրապարակ» թերթը։

Նախորդ կիրակի նա վարել է իր վերջին «Կիրակնօրյա լրատվականը»։ Թերթի աղբյուրի տեղեկացմամբ, նրա պաշտոնանկումը կապված է Ալեքսան Հարությունյանի ամբիցիաների հետ, ով, ըստ շրջանառվող լուրերի, փորձում է վերականգնել իր թիմը Հ1-ում և գործընթացը սկսել է լրատվականից:

Թե ով կփոխարինի Գևորգ Ալթունյանին, առայժմ պարզ չէ, թեև պտտվում են մի քանի անուններ։

Թեկնածուների թվում է Հանրայինի լրատվականի ծառայության նախկին տնօրեն Հարություն Հարությունյանը, ով ժամանակին մտերիմ էր Ալեքսան Հարությունյանի հետ։

Շրջանառվում են նաև «Արմենիա» հեռուստաընկերության լրատվական բաժնի ղեկավար Արտակ Ալեքսանյանի և հաղորդավար Արտակ Հերիքյանի անունները:

Ինչպես գրում է պարբերականը, Հանրայինում չեն բացառվում այլ պաշտոնանկություններ ևս։ -0-