ԵՐԵՎԱՆ, 20 հունիսի./Նովոստի-Արմենիա/. ԱԺ փոխխոսնակ Ալեն Սիմոնյանը ԱԺ «Իմ քայլը» խմբակցության նիստից հետո ճեպազրույցի ժամանակ մեկնաբանել է ՀՀ երկրորդ նախագահ Ռոբերտ Քոչարյանի ազատ արձակումը:
Загружается новость ... "Лево"
Հիշեցնենք, որ այսօր ՔՊ գրասենյակում ԱԺ «Իմ քայլը» խմբակցությունը նիստ էր հրավիրել. նիստին մասնակցում էր նաև վարչապետ Նիկոլ Փաշինյանը:
Հարցին, թե արդյոք իշխանություններին անհանգստացնում է այն, որ Վերաքննիչ դատարանը ՀՀ երկրորդ նախագահ Ռոբերտ Քոչարյանի կալանքը փոխարինեց 2 մլրդ դրամ գրավով, Ալեն Սիմոնյանը նշել է, որ չի անհանգստացնում:
«Ոչ չի անհանգստացնում, ինչի՞ պետք է անհանգստացնի: Անհանգստացնում է մարդկանց զայրույթը և այն ընկալումը, որ ինչ-որ մեկին բռնել եք, բաց եք թողնում»,- հայտնել է Սիմոնյանը:
Ալեն Սիմոնյանը նշել է, որ իրենք դատարանի վճիռների մասին իմանում են բոլորի հետ միասին, երբ դրանք հրապարակային են դառնում:
«Մենք ոչ մեկին չենք բռնում և բաց չենք թողնում: Դա քաղաքական որոշում չի եղել և չէր կարող լինել: Իրավական գործընթացը շարունակվում է, էլի են եղել դեպքեր, երբ Ռոբերտ Քոչարյանին ազատ են արձակել, հետո խափանման միջոցը փոխվել է»,-ընգծել է ԱԺ փոխխոսնակը:
Դիտարկմանը, որ հանրության մեջ կա դժգոհություն, որ խոստացված վեթինգը, բարեփոխումները այդպես էլ չարվեցին, ԱԺ փոխխոսնակը հայտնել է, որ վեթինգը ոչ միայն իր մեջ պարունակում է այն, ինչ ուղիղ իմաստով խոսվում է, այլև տարբեր գործընթացներ, որոնք տեղի են ունենում:
«Բազմաթիվ փոփոխություններ տեղի են ունենում: Ուղղակի քանի որ լրատվական դաշտը, ցավոք սրտի, միտումնավոր թե ոչ միտումնավոր դրա վրա ուշադրություն չի դարձնում, և որևէ բացասական բան ստեղծելու և շրջանառության մեջ դնելու փնտրտուքի մեջ է, հաճախ դա հայտնի չի դառնում: Բոլոր հարցերը՝ լինի վեթինգը, ստեղծված իրավիճակը, քայլ առ քայլ լուծվում են և լուծվելու են: Բոլոր մտահոգություններին է դա վերաբերում»,- նշել է Սիմոնյանը:
Նա նաև անդրադարձել է քաղաքական պատվերների վերաբերյալ շրջանառվող լուրերի մասին:
«Քաղաքական պատվերի, քաղաքական դատարանի մասին յուրաքանչյուր խոսք տապալման է ենթարկվելու, որովհետև եթե այդ տրամաբանությամբ շարժվեինք, ուրեմն Ռոբերտ Քոչարյանին հիմա պետք է բաց չթողնեին»,- նշել է ԱԺ փոխխոսնակը:
Նախօրեին Վերաքննիչ քրեական դատարանն ավարտեց ՀՀ երկրորդ նախագահ, Մարտի 1-ի գործով ամբաստանյալ Ռոբերտ Քոչարյանի պաշտպանների՝ Քոչարյանի խափանման միջոց կալանքը փոխելու միջնորդությունները մերժելու մասին Երևանի ընդհանուր իրավասության դատարանի որոշման դեմ բողոքի քննությունը։ Վերաքննիչ դատարանը բավարարեց Հայաստանի երկրորդ նախագահ Ռոբերտ Քոչարյանի փաստաբանների բողոքը: Նա կալանքից ազատ կարձակվի 2 միլիարդ դրամի գրավը վճարելու դեպքում։
Հիմա ՀՀ երկրորդ նախագահը տանն է: -0-
