ԵՐԵՎԱՆ, 12 նոյեմբերի. /Նովոստի–Արմենիա/. «Մանկական Եվրատեսիլ 2015»–ի հայ մասնակից Միկայի «LOVE» երգը մրցույթի ֆավորիտների թվում է, հինգշաբթի մամուլի ասուլիսի ընթացքում ասաց «Եվրատեսիլի» հայկական պատվիրակության ղեկավար Գոհար Գասպարյանը։
«Մեր ելույթի վերաբերյալ նախնական կանխատեսումները դրական են, իսկ Միկայի երգը` մրցույթի ֆավորիտների շարքում»,– նշեց Գասպարյանը։
Նա ավելացրեց, որ կարևոր չէ, թե որ տեղը կգրավի հայ մասնակիցը` հայկական թիմի համար կարևոր է արժանապատվորեն ելույթ ունենալ։
«Կիրակի առավոտյան մենք կմեկնենք Բուլղարիայի մայրաքաղաք Սոֆիա, որտեղ նոյեմբերի 21–ին կկայանա «Մանկական Եվրատեսիլ 2015» երգի միջազգային մրցույթը։ Տեղական ժամանակով 22։30–ին հանդիսատեսները կկարողանան հետևել մրցույթին Հայաստանի հանրային հեռուստաընկերությամբ»,– նշեց Գասպարյանը։
Նա հիշեցրեց, որ մրցույթին կմասնակցեն 17 երկրներ, ինչը «Մանկական Եվրատեսիլի» համար աննախադեպ թիվ է։ Այդ փաստը, Գասպարյանի կարծիքով, խոսում է այն մասին, որ մրցույթի հեղինակությունը բարձրանում է։
«Միկայի հետ «Եվրատեսիլի» բեմում ելույթ կունենան երեք աղջիկներ, բայց մանրամասներն առայժմ չենք հայտնի։ Կարող ենք միայն ասել, որ հեռուստադիտողներին սպասում է ուրախ, գունեղ, վառ շոու»,– նշեց Գասպարյանը։
Նա ավելացրեց, որ մրցույթից առաջ վերջին օրերը բավականին հագեցած են` դրանք ամենօրյա վոկալ և պարային փորձեր են։
«Եվրատեսիլի» պատանի մասնակից Միկան իր հերթին նշեց, որ դրական է տրամադրված մրցույթի նկատմամբ, ավելացնելով, որ արդեն երեք տարի է, ինչ մասնակցում է «Եվրատեսիլի» ընտրական փուլերին։
«Այս տարի իմ երազանքը կատարվել է, ես ներկայացնելու եմ Հայաստանը մրցույթում, ինչի համար շատ ուրախ եմ»,– ասաց Միկան։
Նա ավելացրեց, որ այս տարի մրցույթին կմասնակցեն շատ ուժեղ և տաղանդավոր մասնակիցներ։
Այս տարի «Մանկական Եվրատեսիլ 2015»-ն կանցկացվի նոյեմբերի 21-ին Բուլղարիայի մայրաքաղաք Սոֆիայում, Armeec համերգասրահում «Discover» («Բացահայտիր») կարգախոսով:
Հայաստանը «Մանկական Եվրատեսիլին» մասնակցում է 2007թ.–ից։ Առաջին անգամ մրցույթին Հայաստանը ներկայացրել է «Արևիկ» մանկական խումբը` «Երազանք» երգով` զբաղեցնելով երկրորդ տեղը։ 2008թ.–ին Մոնիկա Մանուչարյանը ներկայացել է «Իմ երգի հնչյունները» երգով և զբաղեցրել ութերորդ տեղը։ 2009թ.–ին Լաուրա Հայրապետյանն իր «Բարսելոնա» երգով նվաճեց երկրորդ տեղը`այդ տեղը կիսելով Ռուսաստանի ներկայացուցիչ Եկատերինա Ռյաբովայի հետ։
Մեկ տարի անց «Մանկական Եվրատեսիլ» մրցույթին Մինսկում հաղթող ճանաչվեց Հայաստանը ներկայացնող ԼՂՀ 12–ամյա քաղաքացի Վլադիմիր Արզումանյանը, իսկ 2011թ.–ին մրցույթն անցկացվեց Երևանում, որտեղ Հայաստանը ներկայացրեց պատանի երգչուհի Դալիթան։ Compass Band հայկական խումբը, որը 2012թ.–ին Ամստերդամում ներկայացրեց Հայաստանը, զբաղեցրեց երրորդ տեղը։
2013 թվականին Հայաստանի ներկայացուցիչ Մոնիկա Ավանեսյանը Կիևում անցկացված մրցույթում զբաղեցրեց 6–րդ տեղը։ –0–-
