ԵՐԵՎԱՆ, 31 օգոստոսի./Նովոստի–Արմենիա/. Փաստաբանների պալատի նախագահ Արա Զոհրաբյանը օրերս գրառում է կատարել Facebook–յան իր էջում` պատմելով, թե ինչ է իր հետ կատարվել Հյուսիսային պողոտայում։
«Այսօր Հյուսիսային պողոտայում ինձ մոտեցան 4 ոստիկան, և արձանագրություն կազմեցին, այն պատճառաբանությամբ, որ դիմակը չէր ծածկում քիթս և բերանս:
Ընդ որում, դիմակն այդպես էի կրում, քանի որ պարետի որոշմամբ սահմանված կանոնի համաձայն անհրաժեշտ է չհպվել դիմակին օգտագործման ժամանակ, հպվելու դեպքում ձեռքերը մշակել սպիրտ պարունակող միջոցով և լվանալ օճառով:
Հետևաբար, ըստ նույն կանոնի պետք է դիմակին դիպչեի միայն ախտահանման միջոց ունենալու դեպքում, քանի որ դիմակս խոսելու ընթացքում իջել էր», – նշել է նա` ավելացնելով, որ չէր անդրադառնա այս միջադեպին, եթե արձանագրություն կազմող ոստիկանները տիրապետեին ՀՀ վարչական իրավախախտման վերաբերյալ օրենսգրքի (ՎԻՎՕ) ընթացակարգային կանոններին, որոնց պարտավոր էին տիրապետել:
«Սա մտահոգիչ եմ համարում մեծ թվով մեր քաղաքացիներին տուգանելու ֆոնին, քանի որ անիրազեկ քաղաքացին չի կարողանում իրեն պաշտպանել: Ի խախտումն ՎԻՎՕ 225 հոդվածի չբացատրվեց իմ իրավունքները, որոնք նախատեսված են ՎԻՎՕ 267 հոդվածում», – հավելել է նա:
Նրա խոսքով, րձանագրության համապատասխան հատվածում, որտեղ նախատեսված է իրավունքները բացատրելու մասին ոստիկանների գործողության նկարագրությունը, ոստիկանները գաղափար չունեին թե ինչ պետք է բացատրեն։
«Եվ վերջում ոստիկաններից մեկը հպվեց իր դիմակին և երբ պարզեցինք, որ նա խախտում է թույլ տվել, մյուս ոստիկանը (00993) հավաստիացրեց, որ արձանագրություն կկազմեն (այդ պահին վերջացել էին արձանագրության բլանկները): Ոստիկանը պետք է այս դեպքում իմանա ընթացակարգային օրենսդրությունը և յուրաքանչյուր անգամ արձանագրություն կազմելիս պետք է հաշվի առնի գործի բոլոր հանգամանքները և ինքը չխախտի այն, ինչի համար տուգանում է մարդկանց: Տուգանքի որոշում լինելու դեպքում այն վիճարկելու եմ», – եզրափակել է Փաստաբանների պալատի նախագահը:–0–