ԵՐԵՎԱՆ, 3 հոկտեմբերի./Նովոստի–Արմենիա/. ՀՀ առողջապահության նախարարությունը պարզաբանում է նախօրեին տարածված տեղեկատվությունն այն մասին, որ 9 ամսական տղան պատվաստվելուց հետո ծայրահեղ ծանր ախտորոշմամբ տեղափոխվել է «Արաբկիր» բժշկական կենտրոն։
Ինչպես հաղորդում է shamshyan.com–ը, նախօրեին՝ կեսօրին, ծայրահեղ ծանր ախտորոշմամբ Երևանի «Արաբկիր» բժշկական կենտրոն է տեղափոխվել 9 ամսական տղա։ Աղբյուրի հաղորդմամբ, երեխայի ծնողները փոքրիկին տարել են պատվաստման, և 2 օր անց երեխան սկսել է ուժեղ ջերմել։ 4-րդ օրը երեխային տեղափոխել են «Սուրբ Գրիգոր Լուսավորիչ» բժշկական կենտրոն, որտեղ ոչ մի դրական տեղաշարժ երեխայի առողջության ուղղությամբ չի եղել, ծնողները որոշել են երեխային տեղափոխել «Արաբկիր» բժշկական կենտրոն։ Երեխային դեռևս ախտորոշում չի դրվել։ Ըստ կայքի, երեխայի ծնողներից մեկը նշել է որ «Արաբկիր» բժշկական կենտրոնում երեխաների 90 տոկոսը նույն խնդիրով են ու առաջին նշանը՝ բարձր ջերմություն, թոքերում և կրծքավանդակում հեղուկ և այտուցում է լինում։ Կան դեպքեր, որ երիկամները չեն գործում։
Այս իրավիճակի կապակցությամբ պարզաբանում է ներկայացրել ՀՀ առողջապահության նախարարությունը։
«Մամուլում հրապարակված` «Արտակարգ դեպք Երևանում. 9 ամսական տղան պատվաստվելուց հետո ծայրահեղ ծանր ախտորոշմամբ տեղափոխվել է «Արաբկիր» բժշկական կենտրոն» վերտառությամբ հոդվածի վերաբերյալ հայտնում ենք. «Արաբկիր բժշկական» կենտրոնը հերքում է այն հանգամանքը, որ երեխայի մոտ առկա է հետպատվաստումային բարդացում, ըստ բժիշկների՝ նման կարծիքի հանգել է ընտանիքը։ Երեխայի մոտ առկա է սուր սեպտիկ բորբոքային վիճակ, իսկ առաջիկայում կտրվի թարմացում՝ երեխայի վիճակի և վերջնական ախտորոշման վերաբերյալ», – նշում են գերատեսչության մամուլի ծառայությունից։
ԱՆ–ից նաև անդրադարձել են նյութի տեքստում նշված այն պարբերությանը, որ իբր «Արաբկիր» բժշկական կենտրոնում երեխաների 90 տոկոսը նույն խնդրով են ու առաջին նշանը՝ բարձր ջերմություն, թոքերում և կրծքավանդակում հեղուկ և այտուցում է լինում։ Կան դեպքեր, որ երիկամները չեն գործում»` նշելով, որ այս ամենը ևս իրականության հետ որևէ աղերս չունի։
«Բնականաբար, մանկական նեղ մասնագիտական բժշկական օգնություն ցուցաբերող հիվանդանոցում կարող են բուժում ստանալ բազմաթիվ ախտորոշումներով պացիենտներ, սակայն, այս պահի դրությամբ նրանց մոտ հետպատվաստումային կարգավիճակ չկա», – հայտնել են ԱՆ–ից։
Գերատեսչությունից նաև նշել են, որ երեխան «Արաբկիր» ԲԿ տեղափոխվել է ոչ թե «Սուրբ Գրիգոր Լուսավորիչ» բժշկական կենտրոնից, այլ «Սուրբ Աստվածամայր»-ից։
«Shamshyan.com-ին հորդորում ենք թյուր տեղեկատվությունը գրելուց ոչ թե հետո, այլ առաջ ճշտել «իրենց տեղեկությունների» իսկությունը։ Երեխայի ծնողներին խնդրում ենք, հարցերի դեպքում հետադարձ կապ պահել նախարարության հետ», – նշել են Առողջապահության նախարարությունից։–0–