Վաշտի կացարանը, որում տեղակայված են եղել նախօրեին հրդեհից զոհված զինծառայողները, եղել է ժամանակավոր. ՊՆ

ԵՐԵՎԱՆ, 20 հունվարի./Նովոստի–Արմենիա/. Զորամասի ինժեներասակրավորային վաշտի կացարանը, որում տեղակայված են եղել նախօրեին հրդեհից զոհված զինծառայողները, եղել է ժամանակավոր։ Այս մասին Առաջին ալիքին է հայտնել ՀՀ ՊՆ մամուլի քարտուղար Արամ Թորոսյանը։

Նրա խոսքով, զինվորներն այնտեղ էին տեղավորվել մինչև ժամանակակից չափորոշիչներին համապատասխան մշտական տեղակայման վայրի կառուցման ավարտը։


«Դեռևս ամիսներ առաջ պաշտպանության նախարարությունը ձեռք է բերել իտալական արտադրության մոդուլային զորանոցներ, որոնց առաջին խմբաքանակն արդեն Հայաստանում է։ Այս պահին ընթանում են տարածքի բարեկարգման, ինժեներական ցանցերի անցկացման աշխատանքներ, որից հետո կմոնտաժվեն», – ասել է Թորոսյանը։

Նա նաև նշել է, որ ՊՆ–ի ձեռք բերած մոդուլային զորանոցները նախատեսված են լինելու նաև մյուս ստորաբաժանումների համար։ Աշխատանքների վերջնական ժամկետ է սահմանված 2023թ.–ի վերջը։

Ժունվարի 19-ին, ժամը 01:15-ին սահմաններում հրդեհ է բռնկվել Գեղարքունիքի մարզի Ազատ գյուղում գտնվող զորամասի կացարանում։

ՊՆ–ի հաղորդմամբ, հրդեհի հետևանքով 15 զինծառայող զոհվել է, 3–ի վիճակը ծանր է։–0–