ԵՐԵՎԱՆ, 2 մայիսի./Նովոստի-Արմենիա/. «Շիրակացու ճեմարան» միջազգային գիտակրթական համալիրը ներկայացնում է ճեմարանի դիրքորոշումը ապրիլի 28-ի միջադեպի առնչությամբ:
Ստորև ներկայացնում ենք ճեմարանի դիրքորոշումը.
«Հաշվի առնելով ապրիլի 28-ին տեղի ունեցած միջադեպի արտառոց և շատ զգայուն լինելը և խորհրդակցելով ՀՀ Անձնական տվյալների պաշտպանության գործակալության հետ՝ Շիրակացու ճեմարանը չի բացառում դեպքի հանրային նշանակությունը, բայց ռիսկ է տեսնում երեխայի անձի բացահայտման և նույնականացման առումով:
Բացի այն, որ Ճեմարանը իրավական հիմք չունի առանց ծնողների համաձայնության հրապարարկելու երեխայի մասին որևէ տեղեկություն, քանի որ այդպիսով կարող է խախտել երեխայի անձնական տվյալների պաշտպանության իրավունքը, նաև կարևորում է այն զգոնությունն ու արդարամտության սկզբունքը, որով առաջնորդվում են սովորական քաղաքացիներն ու լրատվամիջոցները երեխայի մասին ցանկացած ինֆորմացիայի հրապարակման պարագայում:
Որպես այդպիսին, երեխաների իրավունքները պաշտպանված են կոնվենցիաներով և օրենսդրական մի շարք ակտերով, իսկ լրատվամիջոցների կողմից կատարված հրապարակումները ուղղակի միջամտություն են երեխաների անձնական կյանքի անձնեռնմխելիությանը և ոնտահարում են առնվազն անձնական տվյալների պաշտպանության իրավունքը։
Սենսացիոն բնույթի տեղեկատվությամբ լսարան գրավելու լրատվամիջոցների մեծ ցանկությունը շուտով մարելու է, իսկ երեխայի մասին ցանկացած տեղեկություն հավերժ մնալու է համացանցի հիշողության մեջ՝ հետագայում խանգարելով երեխայի բարի համբավի և կայուն կյանքի կազմակերպման ընթացքին:
Դեպքի առթիվ քրեական վարույթ է նախաձեռնվել, դեպքի հետ կապված ցանկացած հարց, դետալ, տեղեկություն կարող է համարվել քրեական վարույթի՝ հրապարակման ոչ ենթակա տեղեկություն և ըստ այդ՝ ցանկացած անհամաչափ քննարկում կարող է վնասել երեխային և քննական վարույթի պատշաճ իրականացմանը:
Որոշ լրատվամիջոցներ արդեն իսկ, առերևույթ անտեսելով երեխայի լավագույն շահի սկզբունքը, անձնական տվյալների պաշտպանության իրավունքը և քրեական վարույթին չխոչընդոտելու անհրաժեշտությունը, հրապարակումներ են արել. կոչ ենք անում լինել շրջահայաց և մտածել նախքան նախաքննական գաղտնիք պարունակող, հրապարակման ոչ ենթակա, այդ թվում՝ նաև ոչ հավաստի տեղեկության հրապարակումը:
Ճեմարանը հետամուտ է լինելու ոչ պրոֆեսիոնալ և անփույթ աշխատանքի հետևանքների բարձրաձայնմանը, խախտումների բացահայտմանը, որովհետև երեխայի շահը և նրա իրավունքների պաշտպանությունը գերակա են»:
Քննչական կոմիտեի հաղորդմամբ, Շիրակացու Ճեմարանի 4-րդ հարկից 13-ամյա երեխայի ցած ընկնելու և վնասվածքներով «Սուրբ Աստվածամայր» տեղափոխվելու դեպքի առթիվ ՀՀ քննչական կոմիտեի ԵՔՔՎ Ավան և Նոր Նորք վարչական շրջաննների քննչական բաժնում նախաձեռնվել է քրեական վարույթ ՀՀ քրեական օրենսգրքի 162-րդ հոդվածի 2-րդ մասի 2-րդ կետի (անչափահասին ինքնասպանության հասցնելու) հատկանիշներով։ Վարույթի շրջանակներում կատարվել է դեպքի վայրի զննություն, նշանակվել է դատաբժշկական փորձաքննություն, իրականացվում են հարցաքննություններ։
Դասասենյակի լուսամուտից ցած ընկած երեխայի հետ դեռևս քննչական գործողություններ չեն իրականացվել՝ հաշվի առնելով նրա առողջական վիճակը։ Անհրաժեշտ գործողությունները կատարվում են՝ կատարվածի հանգամանանքերը լիարժեք բացահայտելու համար։-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
