ԵՐԵՎԱՆ, 11 հուլիսի./Նովոստի–Արմենիա/. Ռուսաստանում սկսել են առգրավել հայկական համարանիշերով մեքենաները, գրում է
«За рулем» ամսագիրը։
Նշվում է, որ Հայաստանում հաշվառման մեջ գտնվող, բայց ռուսաստանցիների սեփականությունը համարվող մեքենաների արգելքը տարածվել է 2017–2020թթ.–ին ձեռք բերված 200 հազար մեքենաների վրա։
Ըստ հրապարակման, մինչև վերջերս որևէ խնդիր չէր առաջանում` կապված ՌԴ–ում հայկական համարանիշերով մեքենաների հետ, սակայն վերջերս և′ մաքսային մարմինները, և′ ՌԴ ՃՈ–ն հանկարծ սկսել են պահանջներ ներկայացնել։
«Կարելի է ենթադրել, որ այդ ամենը կապված է ոչ միայն սահմանին չվճարված տուրքերի, այլև նման մեքենաների անպատժելիության հետ ճանապարհային տեսախցիկների կողմից խախտումներ ֆիքսելու դեպքում։ Օրինակ, 2019թ.–ի նոյեմբերին նախկին վարչապետ Դմիտրի Մեդվեդևը հանձնարարել էր ՌԴ ՆԳՆ–ին, Տրանսպորտի, արդարադատության նախարարություններին, Մաքսային ծառայությանն ու ԱԴԾ–ին մշակել իրավախախտների դեմ պայքարի մեթոդներ։ Սակայն, կարծես, հանձնարարությունը չէր կատարվել, և դրա փոխարեն որոշվեց ներդնել արգելք», – նշվում է հրապարակման մեջ։
Նշվում է նաև, որ ՌԴ օրենքներում չկան հստակ բացատրություններ, թե արդյոք օրինաչափ է օգտագործել օտարերկրյա համարանիշերով մեքենաներ։ Նման մեքենաների տերերին կարող են օրինակ տուգանել 500 ռուբլով տրանսպորտային միջոցի գրանցման փաստաթղթեր չունենալու համար։
Սակայն դա հակասում է «ՌԴ տարածքում ավտոտրանսպորտային միջոցների և այլ տեսակի ինքնաշարժ տեխնիկայի պետական գրանցման մասին» ՌԴ կառավարության որոշմանը։
Այսինքն, ԵՏՄ երկրների մեքենաները կարող են ազատ տեղաշարժվել Ռուսաստանի տարածքում։ Իսկ մաքսային օրենսդրության մեջ չկա ԵՏՄ երկրում պաշտոնապես ձեռք բերված տրանսպորտը ԵՏՄ տարածքում օգտագործելու արգելք։
Այդուհանդերձ, ինչպես նշվում է հոդվածում, մաքսատունը մեղադրում է ՌԴ քաղաքացի հանդիսացող ավտոսեփականատերերին մաքսային օրենսդրությունը խախտելու մեջ։
«Դա տեղի է ունեցել 2020թ.–ի սկզբին «ԵՏՄ–ին Հայաստանի միանալու պայմանագրի» պատճառով, որտեղ նշված է, որ Հայաստանում գրանցված ավտոմեքենան իրավունք ունի տնօրինել միայն ՀՀ քաղաքացին կամ «Հայաստանի տաածքում մշտապես բնակվող անձը»։ Միաժամանակ Ռուսաստանի ոչ մի օրենքում չկա «մշտական բնակության» եզրույթի նշանակության մեկնաբանությունը», – գրում է ամսագիրն` ավելացնելով, որ հիմա ավտոմեքենաները սկսել են առգրավել։
Կուրգան քաղաքում արդեն առգրավվել է չորս մեքենա։ «За рулем» ամսագիրն ունի առգրավման փաստաթղթերը։ Մեքենաների առգրավման ռեյդեր են իրականացվում Ուրալի և Խանտի–Մանսիական դաշնային շրջաններում, Կուրգանում, Տյումենում, Նիժնևարտովսկում, Չելյաբինսկում։
«Պետք է լուծել օտարերկրյա համարանիշերով մեքենաների տուգանքների հարցը, սակայն ընտրված միջոցը բավականին վիճահարույց է», – կարծում է ամսագրի խմբագրությունը։
«Նովոստի–Արմենիա» գործակալությունն այս հարցը մեկնաբանելու համար դիմել է ՀՀ ճանապարհային ոստիկանությանն ու Պետական եկամուտների կոմիտեին։–0–
