Փորձագետները պարզաբանել են, թե որ պատվաստանյութերն են նախընտրելի հղիների համար
ԵՐԵՎԱՆ, 19 հոկտեմբերի./Նովոստի–Արմենիա/. Վերարտադրողական առողջության հայաստանյան ոլորտի փորձագետները փորձել են պարզաբանել, թե կորոնավիրուսի դեմ որ պատվաստանյութն է նախընտրելի հղիների համար և ինչ ժամկետներում կարելի է պատվաստվել։
«Երբ հարցնում են, որը ընտրենք, ես պատասխանում եմ, որը կառաջարկեն, դա էլ ընտրեք», – ասաց Առողջապահության ազգային ինստիտուտի ուռուցքաբանության ամբիոնի վարիչ, Հայ-ամերիկյան առողջության կենտրոնի վիրաբուժական գինեկոլոգիայի բաժնի վարիչ Վահե Տեր-Մինասյանն այսօր հրավիրված ասուլիսում:
Մանկաբարձ-գինեկոլոգ Ռուսուդան Վարդանյանի խոսքով, նա խոսել է իր գործընկերների՝ իմունաբանների և ալերգոլոգների, վիրուսոլոգների հետ, որ հասկանա, թե ինչու են հղիները հիմնականում նախընտրում չինական պատվաստանյութերը:
«Բանն այն է, որ վերջիններս ստեղծված են ոչ թե mRNA-ի հիմքով, այլ պարունակում են ինակտիվացված վիրուս, և դրանք նույն կերպ են իմունիտետ ձևավորում, ինչպես բոլորիս հայտնի այլ ինակտիվացված վիրուսի հիմքով պատվաստանյութերը, որոնք կիրառվել են նաև մինչև այս պանդեմիան», – ասաց մանկաբարձ-գինեկոլոգը:
ՀՀ առողջապահության նախարարության մանկաբարձության և գինեկոլոգիայի գծով խորհրդատու Վրույր Գրիգորյանի խոսքով էլ, Հայաստանում դեռ չկան հստակ ուղեցույցներ հղիների պատվաստման համար:
«Դրանք մշակելիս մասնագետները հիմնվելու են զարգացած երկրների ուղեցույցերի վրա, ըստ որոնց, հղիների համար այնուամենայնիվ նախընտրելի են mRNA-ի հիմքի վրա պատվաստանյութերը, դրանք Pfizer-ն ու Moderna-ն է», – ասաց Գրիգորյանը:
Նրա խոսքով՝ ինչ վերաբերվում է AstraZeneca-ին, Մեծ Բրիտանիայի ուղեցույցերում նախկինում նշված էր, որ եթե կինը չի իմացել, որ հղի է, և պատվաստվել է AstraZeneca-ով, խորհուրդ էր տրվում երկրորդ դեղաչափը ստանալ այլ պատվաստանյութ՝ mRNA հիմքով:
«Սակայն թարմացված ուղեցույցերի համաձայն՝ եթե հղին ստացել է մեկ դեղաչափ AstraZeneca, երկրորդը 8 շաբաթ անց ևս կարելի է այդ պրեպարատից ստանալ», – ընդգծեց մանկաբարձության և գինեկելոգիայի գծով խորհրդատուն:
Մասնագետը հավելեց նաև, որ կորոնավիրուսի դեմ ցանկալի է պատվաստվել մինչև հղիության 3-րդ եռամսյակը, քանի որ ավելի բարձր ժամկետներում կորոնավիրուսային վարակի հետ կապված բարդությունները ավելի վտանգավոր են:–0–
