ԵՐԵՎԱՆ, 21 հունիսի./Նովոստի–Արմենիա/. ՀՀ վարչապետի պաշտոնակատար Նիկոլ Փաշինյանը հանդես է եկել հայտարարությամբ «Քաղաքացիական պայմանագիր» կուսակցության ընտրական շտաբում արտահերթ խորհրդարանական ընտրություններում քվեարկության արդյունքների կապակցությամբ։
«Արձանագրենք, որ ՀՀ ժողովուրդը խոսեց և կայացրեց իր որոշումը: Այդ որոշման բովանդակությունը պարզ է, այն ձևավորվել է դեռևս նախընտրական քարոզարշավի ժամանակ, բայց արձանագրենք, որ տեղի ունեցավ այն, ինչ կանխատեսվում էր: Իսկ կանխատեսվում էր, որ այս ընտրություններում ՀՀ քաղաքացին հաղթելու է։ Մենք, անցնելով դաժան փորձությունների միջով, կրկին վերգտանք իրար։ Հանրային և ազգային միասնությունը վերականգնելու ժամանակն է», – ասաց նա։
Փաշինյանը հայտարարեց, որ վերջին 3 տարվա ընթացքում Հայաստանի քաղաքացիները երկրորդ հեղափոխությունն արեցին, առաջինը թավշյա հեղափոխությունն էր, այս անգամ՝ պողպատյա։
«Ինչպես և ինչ պայմանավորվել ենք, բոլոր պայմանավորվածություններն ի կատար կածվեն անխուսափելիորեն, որովհետև բոլոր խոստումներն այլևս ժողովրդի կամքն են, իսկ ժողովրդի կամքը պետք է կատարվի անխուսափելիորեն», – ասաց Փաշինյանը։
Փաշինյանը նշեց, որ քաղաքական կոնսուլտացիաներ կսկսեն ընտրություններին մասնակցած բոլոր առողջ քաղաքական ուժերի հետ՝ իշխանության շուրջ համախմբելու և մեր երկրին ծառացած խնդիրների լուծմանը ներգրավվելու համար:
Նա հայտնեց, որ քվեարկության ընդհանուր քարտեզը իրենց արդեն պարզ է:
«Մենք համոզիչ մեծամասնություն կունենանք, որովհետև մեզ տրված մանդատը համոզիչ է: Ես մեր բոլոր ընտրողներին վաղը, ժամը 20:00-ին հրավիրում եմ Հանրապետության հրապարակ, որտեղ տեղի կունենա պողպատե մանդատի խորհրդանշական հանձնումը ՀՀ ընտրված վարչապետին», – ասաց Փաշինյանը։
Ընտրությունների մասին
Հայաստանում հունիսի 20–ին անցկացվեցին արտահերթ խորհրդարանական ընտրություններ։ 38 ընտրական տեղամասերում գործում էին 2008 ընտրատարածքներ, քվեարկությունը մեկնարկել է տեղական ժամանակով 08։00–ին և ավարտվել է 20։00–ին։
ԿԸՀ–ի տվյալներով, Հայաստանի ընտրողների ռեգիստրում ներառված է 2մլն 593 հազար 572 ընտրող։
Ընտրություններին մասնակցում է 4 դաշինք և 21 կուսակցություն։ Դրանք են «Արդար Հայաստանը», Հայ ազգային կոնգրեսը, «Քաղաքացիական պայմանագիր» կուսակցությունը, «Զարթոնք» ազգային–քրիստոնեական կուսակցությունը, «Ազատություն» կուսակցությունը, «Պատիվ ունեմ» դաշինքը, «Միասնական Հայրենիքը», «Համահայկական ազգային պետականություն» կուսակցությունը, «Լուսավոր Հայաստան» կուսակցությունը, «Մեր տունը Հայաստանն է» կուսակցությունը, «Հանրապետություն» կուսակցությունը, «Հայոց հայրենիք» կուսակցությունը, «Ազատ Հայրենիք» դաշինքը, «Բարգավաճ Հայաստան» կուսակցությունը, Հայաստանի դեմոկրատական կուսակցությունը, «5165 ազգային պահպանողական շարժում» կուսակցությունը, «Քաղաքացու որոշում» սոցիալ–դեմոկրատական կուսակցությունը, «Շիրինյան–Բաբաջանյան ժողովրդավարների դաշինքը», «Ազգային օրակարգ» կուսակցությունը, «Վերելք» կուսակցությունը, «Ազատական» կուսակցությունը, Հայաստանի եվրոպական կուսակցությունը, «Ազգային–ժողովրդավարական բևեռ» կուսակցությունը, «Ինքնիշխան Հայաստան» կուսակցությունը։–0–
