ԵՐԵՎԱՆ, 14 մարտի./Նովոստի–Արմենիա/. ՀԱՊԿ-ը ցանկանալով, թե չցանկանալով դուրս է գալիս Հայաստանի Հանրապետությունից, և դա մեզ անհանգստացնում է։ Այս մասին այսօր հայտարարեց ՀՀ վարչապետ Նիկոլ Փաշինյանը։
«Երբ 2020 թվականին ՀԱՊԿ նախագահն այցելել էր Հայաստան, նա ինձ հետ զրույցում ասաց, որ ՀԱՊԿ-ում մտավախություն կա, որ Հայաստանի Հանրապետությունը դուրս կգա ՀԱՊԿ-ից։ Ես ասացի՝ կարծում եմ՝ այդ մտավախությունը տեղին չէ, տեղին է ուրիշ մտավախությունը, որն առկա է Հայաստանի Հանրապետությունում, այն է, որ ՀԱՊԿ-ը դուրս կգա Հայաստանի Հանրապետությունից: Իմ գնահատականն այն է, որ ՀԱՊԿ-ն ցանկանալով, թե չցանկանալով դուրս է գալիս Հայաստանի Հանրապետությունից, եւ դա մեզ անհանգստացնում է», – ասաց Փաշինյանը։
Վարչապետը նշեց, որ ամենագլխավորը ստեղծված իրավիճակում «մեր ժողովրդի հետ ազնիվ լինելու տրամաբանությունն է»։
Հայաստանը, նրա խոսքով, բազմիցս դիմել է ՀԱՊԿ–ին օգնության համար։
«Հայաստանը երկար ու հետևողականորեն է աշխատել ՀԱՊԿ-ի հետ և շարունակում է աշխատել: Հայաստանն իր սկզբունքներն առաջարկել է, որը ՀՀ մասին չէ: «Դա նրա մասին է, թե առնվազն ՀՀ տարածքում ՀԱՊԿ-ը գործում է, թե ոչ, կա, թե չկա: Մենք ուզում ենք և պատրաստ ենք առերեսվել այս հարցին։ 2022-ին ռազմական բախումների ժամանակ տեղեկություններ տարածվեցին, թե ՀՀ կառավարությունը դիմել է ՀԱՊԿ-ին, բայց սխալ հոդվածով է դիմել՝ հատուկ, որ ՀԱՊԿ-ը չկարողանա օգնության գալ: Մենք ՀԱՊԿ-ին դիմել ենք բոլոր հնարավոր հոդվածներով: Մեր գնահատականն այն չէ, որ մենք ՀԱՊԿ-ից դուրս ենք գալիս, մեր գնահատականն այն է, որ ՀԱՊԿ-ն է մեզնից դուրս գալիս, ինչը մեզ համար անհանգստացնող է», – ասաց Փաշինյանը։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում
