ԵՐԵՎԱՆ, 17 մարտի./Նովոստի–Արմենիա/. ՀՀ վարչապետ Նիկոլ Փաշինյանը կառավարության այսօրվա նիստում անդրադարձավ Հայաստանում իրականացվող ռեֆորմներին։
«Ո՞վ է ասում, թե մենք ռեֆորմներ չենք անում։ Այսօրվա նիստի երկու թեմաները ամենախոշոր ռեֆորմների մասին են», – ասաց Փաշիյան` արձագանքելով էկոնոմիկայի նախարար Վահան Քերոբյանի այն հայտարարությանը, թե «ասում են, որ մենք ռեֆորմներ չենք անում»։
Վարչապետը հիշեցրեց, որ երեկվանից ուժի մեջ է մտել հանրային սննդի օբյեկտներում ծխելու արգելքի վերաբերյալ որոշումը, որը կարևորագույն ռեֆորմ է։
«Ուզում եմ ընդգծել, որ այս բոլոր ռեֆորմները չունեն մեկ ուղղություն, դրանք և՛ քաղաքակրթական են, և՛ առողջապահական են, և՛ կառավարչական են, այնպես որ՝ սա շատ կարևոր ուղղություն է», – նշեց Փաշինյանը` հույս հայտնելով, որ այս ճանապարհը կշարունակվի։
«Ես հիմա հետևում եմ, թե ինչ արձագանքներ կան առաջիկայում սպասվելիք մեկ այլ ռեֆորմի մասին, խոսքը գնում է հանրային սննդի օբյեկտներում աղի օգտագործման մասին, որը հիմնականում հումորի թեմա է դառնում, որովհետև ոչ բոլորը գիտեն, թե աղի գերօգտագործումը հետագայում ինչ ազդեցություն է ունենում մեր առղողջության վրա։ Երբ մենք աղի, ծխախոտի օգտագործման բոլոր ստանդարտները գերազանցում ենք, կանգնում ենք առողջապահական խնդրի առաջ։ Մենք կարծես քաղաքականություն ենք վարում ու անընդհատ խթանում ենք, որ մարդիկ ավելի շատ հիվանդություն ձեռք բերեն ու հետո մտածենք՝ ոնց բուժենք»,–ասաց Փաշինյանը։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում