«Նուբարաշեն» ՔԿՀ–ում ապօրինի ջրագիծ է հայտնաբերվել

ԵՐԵՎԱՆ, 7 հունիսի./Նովոստի–Արմենիա/. Օրերս «Վեոլիա Ջուր» ՓԲԸ «Արևելք» տարածաշրջանային տնօրինության «Էրեբունի» տեղամասի կողմից հայտնաբերվել է 100 մմ տրամագծով ապօրինի ջրագիծ: Ջուրը ստանում էր ՀՀ Արդարադատության նախարարության «Նուբարաշեն» քրեակատարողական հիմնարկը:

Այդ մասին Երևանի տարածաշրջանի առևտրային տնօրինության կողմից կազմվել է արձանագրություն, որը «Նուբարաշենի» ներկայացուցիչները հրաժարվել են ստորագրել, նշվում է «Վեոլիա Ջուր» ՓԲԸ–ի տարածած հաղորդագրության մեջ։

«Համաձայն գործող կարգի, կատարվել է նշված հիմնարկի կողմից սպառված ջրի քանակի վերահաշվարկ՝ 91,5 հազար խորանարդ մետր ծավալով, որի դիմաց ենթակա է վճարման մոտ 16,5 մլն դրամ: Ապօրինի ջրագիծը ապամոնտաժվել է նույն օրը», – նշվում է հաղորդագրության մեջ:–0–