Միրզոյանը մեկնաբանել է Թուրքիայի հետ ընթացող բանակցությունների մասին լուրերը

ԵՐԵՎԱՆ, 4 նոյեմբերի./Նովոստի–Արմենիա/. Այս պահին Թուրքիայի հետ որևէ բանակցային գործընթաց դեռ չի ընթանում, հայտարարել է ՀՀ ԱԳ նախարար Արարատ Միրզոյանը «Nouvelles d'Arménie» ամսագրին տված հարցազրույցում` պատասխանելով այն հարցին, թե ինչպիսի՞ն է Հայաստանի դիրքորոշումը Թուրքիայի հետ հարաբերությունների վերաբերյալ: Արդյո՞ք տեսանելի ապագայում կարելի է այս առումով զարգացումների սպասել:

Նա նշել է, որ Հայաստանի կառավարության ծրագրում ամրագրված է, որ Հայաստանը պատրաստակամ է Թուրքիայի հետ առանց նախապայմանների հարաբերությունների կարգավորմանը։

«Հայաստանի և Թուրքիայի միջև դիվանագիտական հարաբերությունների բացակայությունը, փակ սահմանները, ինչպես նաև 44-օրյա պատերազմում Թուրքիայի բացահայտ ներգրավվածությունը, այս օրերին Թուրքիայից այսպես կոչված «Զանգեզուրյան միջանցքի» վերաբերյալ հնչող հայտարարությունները իրենց բացասական ազդեցությունն են ունենում տարածաշրջանում կայունության վրա», – մեջբերել են Միրզոյանի խոսքերը ՀՀ ԱԳՆ–ի մամուլի ծառայությունից։

Միրզոյանը նաև նշել է, որ այնուամենայնիվ, վարչապետ Նիկոլ Փաշինյանն իր հրապարակային ելույթներում հնչեցրել է հայկական կողմի տեսակետը, որ Թուրքիայի կողմից հարաբերությունների կարգավորման պատրաստակամության և համապատասխան գործողությունների դեպքում Հայաստանը պատրաստ է քննարկել երկկողմ հարաբերությունների կառուցման հնարավորությունները։–0–