«Մեր տղաներին էնպիսի դիրքեր են տարել, որտեղից մի քանի հոգի են փրկվել».անհետ կորած զինվորների հարազատները բողոքի ակցիա են կազմակերպել ԱԱԾ շենքի դիմաց (ՎԻԴԵՈ)
15:01
19 Օգոստոսի 2021
ԵՐԵՎԱՆ, 19 օգոստոսի./Նովոստի–Արմենիա/. Արցախյան 44-օրյա պատերազմում անհետ կորած զինծառայողների ծնողներն ու հարազատները բողոքի ակցիա են կազմակերպել Ազգային անվտանգության ծառայության շենքի դիմաց:
Նրանք պահանջում են ավելի հստակեցնել որոնողական աշխատանքների շրջանակում ձեռնարկվող քայլերը։
«Պահանջում ենք, որպեսզի ստանանք մեր երեխաների աճյունները կամ, եթե ողջ են ու գերի են, այդ ուղղությամբ քայլեր ձեռնարկվեն ու հայրենիք վերադարձվեն: Հավաքվել ենք ընդամենը 1 դիվիզիոնի ծնողներով: Մենք անելանելի վիճակում ենք հայտնվել, համագործակցում ենք բոլոր կառույցների հետ: Արդեն 10 ամիս է, ինչ անհրաժեշտ փաստեր, տվյալներ կան, տրամադրում ենք»մ – նշեց անհետ կորած զինծառայողներից մեկի ծնողն` ավելացնելով, որ 21 անհետ կորած զինծառայողից միայն 9-ի մասունքներն են գտնվել, նրանցից ութինը նույնականացվել են, մեկինը՝ դեռ չի ստացվում:
Հարազատները նշել են , որ իրենց տղաներին այնպիսի դիրքեր են տարել, որտեղից մի քանի հոգի են փրկվել:
«Մեկ սպա է եղել, որ մինչև վերջ մնացել է տղաների կողքին, և նրա ճակատագիրն էլ այժմ անհայտ է: Այս տեղեկությունները մենք ենք պարզել, դիմել ենք դատախազություն»,- նշել են նրանք:
Անհետ կորած զինծառայողների ծնողները 2 անգամ հանդիպել են Ազգային անվտանգության ծառայության տնօրեն Արմեն Աբազյանի հետ, ով օգնելու խոստում է տվել, սակայն մինչ օրս այն չի կատարվել:
«Մենք պետք է այսօր մտնենք պարոն Աբազյանի մոտ և այդ հարցն էլ բարձրացնենք: Վերջին հանդիպումը եղել է հունիին: Նշեմ նաև, որ մեր երեխաների ուղղությամբ չի աշխատել ծանր հրետանի կամ ԱԹՍ-ներ, տեսանյութեր էլ կան, որ մարմիններն ամբողջական են»,- ասել է ակցիայի մասնակից ծնողը:
Լրագրողների հետ զրույցից հետո ծնողները մտել են ԱԱԾ շենք, որտեղ աշխատակիցները սկսել են ճշտումներ կատարել՝ արդյոք Աբազյանը կարո՞ղ է ընդունել նրանց:
Անհետ կորածների հարազատները ԱԱԾ շենք մտնելով՝ ասել են, որ այնտեղ են մնալու այնքան ժամանակ մինչև իրենց խնդրին լուծում տրվի:–0–
